Genf (dpa/SN). Ličba natyknjenjow z koronawirusom po wšěm swěće najebać jasne wotputanje w Europje dale přiběra. Minjeny kónc tydźenja su w běhu 24 hodźin wjace hač 136 000 padow zličili, telko kaž hišće ženje do toho, zdźěli nawoda Swětoweje strowotniskeje organizacije (WHO) Tedros Adhanon Ghebreyesus wčera w Genfje. Wón tuž kraje warnuje, woteběraceje ličby infekcijow dla wěstotne naprawy nastupajo popušćić.

Na dźewjeć z dźesać minjenych dnjow su wjace hač 100 000 nowych infekcijow registrowali, Tedros rjekny. W Africe, centralnej a južnej Aziji, w Srjedźnej a Južnej Americe a w někotrych krajach wuchodneje Europy ličby dale přiběraja. Wot wudyrjenja wirusa loni kónc lěta je po cyłym swěće nimale sydom milionow infekcijow a 400 000 smjertnych padow.

Najwjetši strach w krajach z woteběracymi ličbami stej sebjespokojnosć a ležernosć. Najwjace ludźi njeje wirus hišće měło a móhło so hišće natyknyć, Tedros warnuje. „Nětko njeje prawy wokomik, w napinanjach popušćić.“ Ludźo dyr­bjeli dale wěstotny wotstawk dodźeržeć, sej ruce myć a škitne zakryće nosyć.

Na braniborskich stanowanišćach liča z wulkim nawalom dowolnikow

Podstupim (dpa/SN). Wobhospodarjerjo stanowanišćow Braniborskeje wočakuja w lěću hoberski nawal dowolnikow a dale trajacy trend campinga.

Tójšto camperow, kotřiž bychu hewak do wukraja jěli, so lětsa z wulkeho dźěla za Němsku rozsudźeja“, rjekny wicepre­zident Zwjazka campingoweho hospodarstwa Braniborskeje Jörg Klofski po­wěsćerni dpa. Jako bě w meji wotwidźeć, zo budźe po prěnich naprawach korony dla w lěću zaso móžno stanować, je ličba skazankow jara přiběrała. „Ně­kotryžkuli z kolegow je tykačk wućahnył, zo by telefon prosće raz mjelčał“, Klofski potwjerdźi.

Po prěnich wotewrjenjach na Bože spěće móžeše branša stanowanišća poněčim zaso bóle wućežić. Spočatnje pak rjadowanja nastupajo sanitarny wobłuk wobchodnistwo hišće haćachu. Camperojo bjez nuznika w awće tuž scyła hakle njepřijědźechu. Wotpowědnje małe běchu wobroty.

Wulki Šunow/Varnsdorf (SN). Mjeztym 53 lět pěstuje dobrowólna wohnjowa wobora w sakskim Wulkim Šunowje (Großschönau) wuske přećelske styki k wobornikam w čěskim Varnsdorfje a wokolinje. Za nuzowy pad maja tam samo dojednanje wo mjezsobnej pomocy. Tak móža wobornicy mjezu překročić, njedyrbjeli-li mocy susoda hižo dosahać. Na tajke něšto njebě minjene 83 dnjow k myslenju. Koronawirusa dla wosta mjeza mjez Wulkim Šunowom a Warnoćicami zawrjena. Z betonowymi zawěrami a płotami bě dróha zaraćena. Ani přećelski wopyt njebě w tym času móžny.

Poćehnjenje łoža je paducha we Wormsu přeradźiło. 40lětny bě so minjenu nóc do bydlenja zadobył. Jako wobydlerka to pytny, wona swojeho žiwjenskeho partnera zazwoni. Tón poda so hnydom na puć k domej a zetka muža, kiž w poćehnjenju poslešća něšto transportowaše. Dokelž bě jemu cycha znata, wón paducha narěča. Tón swoju rubiznu nablaku pušći a ćekny. Muž pak jeho dosahny a policistam přepoda.

Pilotny projekt ze 6 000 němskimi turistami chcedźa na Mallorce a druhich balearskich kupach přewjesć. Tak chcedźa pruwować, hač su nastupajo wěstotne naprawy koronawirusa dla na hoberski nawal turistow přihotowani, z kotrymž liča po wotewrjenju mjezow 1. julija. Němsku su wuzwolili, dokelž je tam poměrnje mało infekcijow z wirusom. Do karanteny turisća njetrjebaja.