Berlin (dpa/SN). Zwjazkowy wonkowny minister Heiko Maas (SPD) je dźensa we wobłuku widejokonferency ze swojimi kolegami mjez Němcami woblubowanych dowolowych krajow wuradźował, kak móhli wobmjezowanja pućowanja koronapandemije dla poněčim zaso zběhnyć. Na widejowu konferencu přeprošeni běchu Španiska, Italska, Awstriska, Grjekska, Chorwatska, Portugal, Malta, Słowjenska, Cypern a Bołharska. Zaměr konferency bě, kak při wotewrjenju mjezow za turistow koordinujo postupować. W Němskej płaći hač do 14. junija swět wopřijace warnowanje před jězbami do wukraja. Maas chcył je po tym krok po kroku zběhnyć, wostanje-li połoženje nowych infekcijow dla přewidne. Zakład toho su wot komisije EU zestajane směrnicy za turizm w časach krizy.

Heiko Maas je dźensa w rańšim magacinje sćelaka ARD na pozitiwne wuwiće we wjacorych krajach pokazał. Tak móhła tež Němska wobmjezowanja pućowanja zaso zběhnyć. Ludźo pak měli wědźeć, kotre prawidła we wukraju płaća.

Mnozy skedźbnjeja na hrožacy strach, zo su demonstracije přećiwo naprawam koronakrizy dla dźeń a bóle wot prawicarjow dominowane. Woni spytaja, kritiski potencial přećiwo knježerstwu za swoje „rewolucionarne“ cile znjewužiwać. Dyrbiš pak zwěsćić, zo zetkawaja so na tychle demonstracijach ludźo z cyłeho politiskeho spektruma, wot lěweje hač do praweje flanki – byrnjež z rozdźělnej motiwaciju. Wšitcy pak naprawy do prašenja stajeja. Wšako wone zakładne prawa ranja. Zo njeje strowota wjetša hódnota hač swoboda, na to je spisowaćelka, juristka a čłonka SPD Juli Zeh hižo před dźesać lětami w romanje „Corpus Delicti“ pokazała a dźensniši konflikt tehdy hižo tematizowała. Raznje – zdobom je čestnohamtska sudnica na Braniborskim wustawowym sudnistwje – wupraja so wona tež nětko přećiwo wottwarej zakładnych prawow. Tajka diskusija njeje w demokratiji jenož dowolena, ale trěbna. Cordula Ratajczakowa

Choćebuz (dpa/SN). Dźe wo sta kilogramow marihuany: Z předčitanjom wobskóržby je so minjeny pjatk w Choćebuzu proces přećiwo pozdatnej cwólbje wikowarjow drogow z Braniborskeje a Berlina zahajił. Jedna žona a štyrjo mužojo dyrbja so před krajnym sudnistwom zamołwić. Woni su wobskorženi, dokelž su zhromadnje we wulkim stilu z drogami wikowali. W lětomaj 2018 a 2019 běchu marihuanu w cyłkownym mnóstwje 750 kilogramow kupowali a z wopojadłom wikowali, rěčnica sudnistwa Susanne Becker zdźěli. Cyłkownje dźe wo cyłu tonu drogow, předewšěm marihuanu.

Zazběh procesa wotmě so w njewšědnej wokolinje. Směrnicow wotstawka koronapandemije dla su za zjawne sudniske jednanje jednu z wikowych halow města Choćebuza na sudnisku žurlu přetwarili. Kóždy wobskorženy ma dweju prawiznikow poboku. Tež sudnistwo, statne rěčnistwo, swědcy a přihladowarjo trjebaja dosć městna, kaž Becker rjekny. Za telko ludźi nimaja na krajnym sudnistwje kmanu rumnosć. Za proces planuja dźewjeć sudniskich terminow. Wobskorženym hrozy hač do 15 lět jastwa.

Nócny alarmowy zwuk je w sewjerorynsko-westfalskim Münsteru wjacorym ludźom spar rubił. Alarmowani wohnjowi wobornicy zwěsćichu, zo pochadźa hara wot budźaka, kotryž ležeše w kontejneru za elektrošrot. Metalowe sudobjo skutkowaše při tym kaž rezonancne ćěleso a zwuk hišće zesylni. Šwižnemu wobornikej so poradźi do wěka kontejnera zalězć a budźak ze sekeru rozbić.

Na pućowanje po sławnym, ale tuchwilu zawrjenym Awstralskim muzeju w Sydneyju poda so wčera 25lětny muž. Ze swojim handyjom je so stajnje zaso sam fotografował. Tak połoži swoju hłowu do daloko wočinjeneho nopa dinosawriera, kaž awtomatiske stražne kamery dokumentuja. Pozdźišo staji sej kłobuk, kotryž bě w garderobje namakał. Policija je muža mjeztym zajała. 190 lět stary muzej je najstarši přirodohistoriski muzej swěta.