Istanbul (dpa/SN). Ruska a Ukraina stej dźensa, hladajo na mjeztym dlěje hač tři lěta trajacu wójnu, ze swojimi w nalěću zahajenymi jednanjemi pokročowałoj. Při tym pak njewuradźuja prěnjotnje wo skónčenju wójny. Ukrainski prezident Wolodymyr Zelenskyj je wčera sowje ­wočakowanja na nowe koło rozmołwow znižił.

Ukrainje stej wuměna wójnskich jatych a nawrót dźěći, kotrež je Ruska za­wlekła, wažnej. Nimo toho chce Zelensky wo móžnym zetkanju z ruskim prezidentom Wladimirom Putinom rěčeć. Krjeml njebě tajke zetkanje wuzamknył, žada sej pak do toho zhromadny měrowy plan.

Rusku delegaciju nawjeduje poradźowar prezidenta, bywši minister za kul­turu Wladimir Medinski. Hłowny zastupnik Ukrainy je Rustem Umjerow, tež hdyž je jako zakitowanski minister wotstupił. Zelenskyj bě jeho za sekretara narodneje wěstotneje rady powołał. Ruska dale na swojich žadanjach wobstawa. To je mjez druhim přiswojenje wobsadźenych kónčin a neutralna Ukraina.

Tuchwilu wotměwa so europske mišterstwo žonow w Šwicarskej. Tójšto pozitiwneje kedźbnosće zhoni tutón wuznamny ewent, tola negatiwne komentary njedadźa dołho na so čakać. Mnohostronske pak tute nažel njejsu. Přeco zaso, přewažnje wězo mužojo, hrajny stil žonow wobšěrnje komentuja a z hrajnym stilom mužow přirunuja. To wšak poprawom scyła móžno njeje. Žony hraja pod mnohimi druhimi wuměnjenjemi. Na přikład maja hinašu anatomiju hač mužojo a tohodla je riziko za wěste zranjenja wyše. Po wobkedźbowanju tutoho wuchadźišća po­tajkim zwěsćimy, zo žónski splah wjace na koparskim hrajnišću wukonja hač ­muski splah.

Přidatnje hodźi so naspomnić, zo je wot 1970 (zakaz za žónsku kopańcu bu oficialnje zběhnjeny) dosć časa zašło zrozumić, zo njeje kopańca wjace ryzy muski sport. A doniž njejsu tole wšitcy zrozumili, njebudźe negatiwnych komentarow bohužel mjenje. Stella Pilzec

Šwikawa (dpa/SN). Njewěsteje situacije w awtomobilowej branši dla, kotruž su wosebje produkciske skrótšenja pola VW w Šwikawje zawinili, žadaja sej regionalni akterojo wosebite hospodarske pasmo za juhozapadnu Saksku. Zaměr tutoho pasma je přićahliwosć nowych zawodow z dawkowymi powabkami a spěšnišimi dowolnosćemi. Předewšěm wabja za wob­łuki w zakitowanju, kumštnej inteligency a robotice. Tola wulki zadźěwk su kóšty energije a pobrachowacy personal.

Produkciske cofnjenje pola VW, mjez druhim dla šmórnjenja nócneje słužby a redukowanja hotowanskeje linije, wohrožuje mnoho dźěłowych městnow. Agentura za dźěło warnuje před dwucyfrowej kwotu bjezdźěłnosće. Kwota we wokrjesu Šwikawy je hižo wot 5,1 na 6,0 procentow rozrostła. To rěka, zo je ně­hdźe 9 700 wobydlerjow tuchwilu bjezdźěłnych. Tež wukubłanskich městnow je mało. Krajny rada Carsten Michaelis (CDU) praji, zo njeje awtowa industrija zhubjena. Přiwšěm pak wuzběhuje trěbnosć nowych hospodarskich perspektiwow. Zhorjelc pokaza, kak zawod we brónjenskim wobłuku za twar pancerowych dźělow wužiwaja.