Jědojtu rohowu wiperu nańdźechu wobydlerjo wjaceswójbneho domu wčera w pozaarskim měsće Schiffweiler. Prawdźepodobnje wobsedźer hada dlěje wjace doma był njeje. 16 wobydlerjow dyrbješe twarjenje na to wopušćić, zo bychu za­sadźenske mocy dalše zwěrjata pytać móhli. Po prěnich podaćach namakachu dalšeho jědojteho hada a wjacore po­wšěm zdaću tohorunja jědojte pawki.

Dokelž so za popularnu hólču hudźbnu skupinu BTS z Južneje Koreje zahorjatej, stej dwě 13lětnej holcy z Pakistana chcyłoj so do Južneje Koreje podać. Policija jeju při tym popadny. Po jeje informacijach běštej so holcy nadźijałoj, swojeju pop-idolow zetkać. Skupina ma w Pakistanje wjele fanow. W konserwatiwno-muslimskim Pakistanje płaći spěwanje a rejowanje žonow w zjawnosći na mnohich městnach hišće jako njepřistojne.

1Załožbowa rada je aktualnje gremij za rozsudy wo ćežišćach rozdźělenja srědkow serbskim institucijam a projektam. W tutym chcu rady sobu dźěłać a wosebje perspektiwu swojich prócowanjow wo rewitalizowanje w ewangelskim nakromnym wobłuku za serbsku identitu, rěč, kulturu a nabožnosć přinošować.

2Wosebita tema je dobre wuhotowanje wulkopředewzaća na Budyskim Lawskim arealu. Najwjetše wužadanje, tež přidatnych projektow strukturneje změny, wostanje zachowanje serbskeje wšědneje rěče w jadrowej kónčinje kaž wozrodźenje w tak mjenowanych nakromnych kónčinach, hdźež bydlu.

3Za zdźerženje a posrědkowanje rěče je stopnjowanje motiwacije wobdźělenych rozsudźacy faktor. Zadźěwki, kotrež frustraciju zawinuja, chcu sobu wotstronić. Kulturne projekty a puće, swójsku serbsku identitu znowa wotkryć, widźu jako móst k rěči a chcu je podpěrać. Budu na konsekwentnu ewaluaciju wšitkich wuslědkow projektow a institucijow a na zjednorjenja při zapodaću próstwy a wotličenju tłóčić.

Erkelenz (dpa/SN). Policija je dźensa rano započała z krutej ruku aktiwistow wupokazować, kotřiž Lützerath zakituja. Wjes ma so brunicy dla wotbagrować. Štóž městno nětko hišće dobrowólnje wopušći, tomu prawniske konsekwency njehroža. To je poskitk policije. Energijowy koncern RWE chce přichodne tydźenje zbywace twarjenja a dalšu infrastrukturu zwottorhać a tuž połdra kilometra dołhi płót wokoło wsy natwarić.

Soledar wobstupjeny abo nic?

Kiew (dpa/SN). Zlě wuwołane Wagnerowe jednotki su strategisce wažne město Soledar we wuchodnej Ukrainje pječa wobsadźili. Šef Jewgenij Prošin je agenturje Tass wčera zdźělił, zo su centrum města a tam zaměstnjenu ukrainsku jednotku wobstupili. „Tunju propagandu“ mjenuja to ukrainscy wojerscy wobkedźbowarjo. Ukrainske jednotki su so pječa jenož na nowe pozicije podali. Ani ukrainske wjednistwo ani ruske wójsko pak njejstej oficialne stejišćo k tomu wozjewiłoj.

Stat dyrbi zašo zapřimnyć

Berlin (dpa/SN). Zwjazkowy prezident Frank-Walter Steinmeier (SPD) je wčera ze swojej mandźelskej Elke Büdenbender po nimale třoch lětach přestawki korony dla zaso na tradicionalne nowolětne ­přijeće do Berlinskeho hrodu Bellevue prosył.

Nimo 70 čestnohamtsce angažowanych wobydlerjow a 160 reprezentantow zjawneho žiwjenja běchu tež zastupjerjo wuchowanskich słužbow, policije a wohnjoweje wobory přitomni. W běhu 3,5 hodźin je so Steinmeier z kóždym z nich wosobinsce wo žiwjenskich nazhonjenjach rozmołwjał. Hladajo na silwesterske krawale w Berlinje a w druhich němskich městach so zwjazkowy prezident za spěšne konsekwency za randalěrarjow wupraji. „Wočakuju, zo jako towaršnosć česćownosć wšěm tym wopokazamy, ­kotřiž so wšědnje za zdźerženje našeje demokratije angažuja a zasadźuja,“ wón podšmórny.

Tež předsyda Domowiny, Dawid Statnik, je so w swojej funkciji jako předsyda mjeńšinoweje rady na přijeću wobdźělił.