Wiesbaden (dpa/SN). W Němskej njeje so loni telko mjasa produkowało hač lěta do toho. Rězarnje su sydom milionow tonow mjasa produkowali, zdźěli wčera zwjazkowy statistiski zarjad ze sydłom we Wiesbadenje. To je dobrych wosom procentow abo 0,6 milion tonow mjenje hač w lěće 2021. Po rekordnym lěće 2016 z 8,3 milionami tonami mjasa, produk­cija dale woteběra. Kaž statistikarjo wuswětla, bě spad loni jara wulki. Do­hromady su w rězarnjach 51,2 milionaj swinjow, howjadow, wowcow, kozy a konje kaž tež 701,4 miliony kokošow, ­trutow a kačkow zarězali. Cyłkownje ­produkowachu rězarnje něhdźe 4,5 milionow tonow swinjaceho mjasa, štož je nimale dźesać procentow mjenje hač lěto do toho.

Paris/Brüssel (dpa/SN). Ukrainski prezident Wolodymyr Zelenskyj chce so dźensa na wjeršku EU w Brüsselu wobdźělić. Wčera bě wón knježerstwo we Wulkej Britaniskej wopytał. Po tym poda so wón do Parisa, hdźež zetka so ze zwjazkowym kanclerom Olafom Scholzom (SPD) a francoskim prezidentom Emmanuelom Macronom. Zelenskyj chce dalše brónje, „kotrež su za měr w Ukrainje trěbne“. Scholz a Macron jemu dalšu podpěru přilubištaj. We Wulkej Britaniskej je ukrainski prezident wo wojerske lětadła prosył.

W Brüsselu chce wón před parla­mentom EU rěčeć. Dokładny wotběh ­wěstotnych přičin dla jasny njeje. Tam wočakuja, zo wón znowa wo podpěru we wójnje přećiwo Ruskej prosy. Dale budźe Zelenskyj přistup Ukrainy do EU wobjednawać. Knježerstwo w Kijewje chce hišće lětsa jednanje wo přistup zahajić. Tomu pak dyrbi 27 čłonskich statow jedno­hłósnje přihłosować.

Wo spěšnych železniskich zwiskach mjez Němskej a Pólskej wuradźowali

Podstupim (dpa/SN). Zastupjerjo braniborskeho, sakskeho a pólskeho knježerstwa su so wčera w Podstupimje z předsydstwami železniskich předewzaćow schadźowali. Zhromadnje su wo tym ­wuradźowali, kak móhli lěpše wobchadne zwiski mjez Němskej a Pólskej zaručić. Hišće do zeńdźenja braniborski minis­terski prezident Dietmar Woidke (SPD) wuzběhny, zo chce za ICE-projekt mjez Berlinom–Choćebuzom–Zhorjelcom a Wrócławjom wabić. W tamnych europskich krajach su spěšne železniske zwiski dospołnje normalne. Za Łužicu pak tole njepřitrjechi. „Tež do směra Pólskeje měli spěšniki ICE jězdźić. Za to chcu wojować“, Woidke podšmórny.

Hladajo na derje wuhotowane wobchadne zwiski njejsu wuhlady za Budyski region najlěpše. Tole je znowa po wčerawšim „železniskim wjeršku“ w Podstupimje wěste. Tak ma so projekt spěšnika mjez Berlinom přez Choćebuz a Zhorjelc dale do Wrócławja najprjedy wuwić. Rěč wo spěšnym ­zwisku mjez Drježdźanami a Zhorjelcom žadyn tema njeje. To je za wobydlerjow a přede­wzaća w Hornjej Łužicy přesłapjace. Hač do Drježdźan su železniske čary elektrifi­kowane. Tež w Pólskej su železniske předewzaća swoje domjace nadawki spjelnili a zwiski hač do Zhorjelca elektrifikowali. Čara mjez Drježdźanami hač k pólskej mjezy nima po wšěm zdaću tajki ­wulki wuznam, byrnjež su předewzaća kaž na přikład Alstom abo Siemens podłu čary zaměstnjene. Nimo derje wuhotowaneho železniskeho zwiska klaca tež na zwjazkowej awtodróze A 4, hdźež so jězdźidła ­kopja. Móžu ludźi w Hornjej Łužicy zro­zumić, ­jelizo so prašeja: A što je z nami? Bianka Šeferowa