To a tamne (16.02.23)
Ratar je 1 200 kilometrow po Thailandskej nóžkował, zo by so na dnju Walentina ze žonu woženił, kotruž njeje hišće nihdy wosobinsce zetkał. 52lětny Suthep bě 56lětnu předawarku Thanapu před pjeć měsacami w interneće zeznał, jako sej rybowu pastu pola njeje skaza. Thanapa je swojeho Suthepa najprjedy skerje žortnje namołwjała, pěši k njej do daloko zdaleneje južneje prowincy Satun přińć. Suthep je wěc chutnje brał. Na dnju Walentina je wón Satun docpěł a so ze Thanapu zmandźelił.
Nurjerjo francoskeho cłownistwa su pod z Brazilskeje přijědźenej łódźu 180 kilogramow kokaina w hódnoće wjace hač 15 milionow eurow namakali. Nurjerjo běchu něšto spodźiwne při łódźi pod wodu wuhladali a to bliže přepytowali, zarjad wčera zdźěli. Kapitana łódźe su cłownicy najprjedy raz zajeli.
Zbytne lisćiki dźensa wuliča
Berlin (SN). Tři dnjow po wospjetnych wólbach w Berlinje dźensa zjawnje poslednich 466 wólbnych lisćikow wuliča. W Berlinje Lichtenbergu su lisćiki přepozdźe dóšli a njemóžachu so tuž minjenu njedźelu sobu ličić. Dźensa dopołdnja započachu lisćiki wuličić, štož móhło po słowach wólbneho nawodu wobwoda Axela Hungera cyły dźeń trać. Prawdźepodobnje pak budźe dźensa hišće mjezywuslědk wozjewjeny. Hladajo na rozdźěl 105 hłosow mjez SPD a Zelenych móhł so njedźelniši wuslědk hišće změnić.
Wuwučuja rjadownje hromadźe
Wiefelstede (SN). Přemało wučerjow dla chcyše zakładna šula w delnjosakskim Wiefelstede něhdźe 300 šulerjam jedyn wučbny dźeń šmórnyć. Wčera su wšelake medije wo tym rozprawjeli, a kultusowe ministerstwo je samsny dźeń reagowało. Tak je přepruwowanje wujewiło, zo su tola hišće kapacity, tak zo móža šulerjo wšitkich pjeć dnjow do šule přińć. Rjadownje jednoho lětnika maja so přechodnje hromadźe wuwučować.
Měnjenja młodostnych zapřijeć
Wulki plakat su akterojo na Riebeckowym naměsće w Halle instalowali, ...
Za škit rěki dóstanu miliony
Berlin (dpa/SN). Wědomostnicy Leibnizoweho instituta za ekologiju wodźiznow a łódźnistwo maja so we wobłuku slědźenskeho projekta ze sćěhami mortwych rybow we Wódrje zaběrać. Za to dóstanu wot Zwjazka wjace hač 4,8 milionow eurow, zdźěli wčera zwjazkowe wobswětowe ministerstwo w Berlinje. Zaměr je, rěku na mjezy Němskeje a Pólskeje lěpje škitać. Loni su we Wódrje masy rybow zahinyli. Fachowcy z toho wuchadźeja, zo běchu za to wšelake přičiny. Tak běše na přikład wobstatk sele we wodźe jara wysoki. Tohorunja njebě dosć wody we Wódrje, štož běše w zwisku z horcymi temperaturami w lěću fatalne.
Zwjazkowa wobswětowa ministerka Steffi Lemke (Zeleni) zwurazni, zo chcetej Němska a Pólska warnowanske systemy a naprawy wuwić, zo bychu we Wódrje stabilne wuměnjenja knježili.
Za přiměr a měr
Kónc spalowanskeho motora w EU
Łužiski „Lützerath“
To a tamne (15.02.23)
Dla ataki z psyčim hownom suspendowany baletny šef statneje opery w Hannoveru Marco Goecke je so k swojemu nadběhej na žurnalistku wuprajił. „Myslu sej, zo njebě tutón srědk w porjadku“, 50lětny w interviewje NDR wujasni. „Sym čłowjek, kotryž njeje dotal hišće nihdy tajke něšto skućił, tuž sym so wězo tež kusk přez sebje samoho stróžił.“ Minjenu sobotu bě Goecke kritikarku nowiny Frankfurter Allgemeine Zeitung z psyčim hownom namórał. Do toho bě jej wumjetował, zo přeco złe wosobinske kritiki pisa.
Jutry móža w Jendźelskej tola na zwučene wašnje woswjećić. Tak je policija pozdatneho paducha 200 000 šokolodźanych jejkow lepiła. 32lětny muž je typiske britiske jutrowne słódkosće pokradnył. Zastojnicy běchu do toho wo honjeńcy za podhladnym rozprawjeli, kotryž je „najskerje jako jutrowny zajac“ po puću.
Dalše wonječesćenje křesćanskeho pomnika
Budyšin (SN/bš). Zańdźene dny zwěsćichu so dalše wonječesćenja křesćanskich postawow. Tak su njeznaći na Budyskim Mikławšku w minjenych dnjach na rowje biskopa Jurja Łusčanskeho korpus křižowaneho pokradnyli. „Koporowy korpus je so z narowneho kamjentneho křiža wułamał“, zdźěli daloki přiwuzny biskopa Jurij Łušćanski. Hdy je so skućićelstwo stało, njeje dokładnje jasne. Dyrbjało to pak w poslednich tydźenjach być, kaž Łušćanski w rozmołwje zdźěli. „Kónc tydźenja před dwěmaj tydźenjomaj běch korpus hišće wuhladał.“, wón doda. Kěrchow je wodnjo za přiwuznych a wopytowarjow přistupny.
Tachantska fara Budyšina je pola kriminalneje policije padustwo přizjewiła. Nic jenož na Mikławšku běchu skućićeljo po puću, ale tež na Marijinym kěrchowje, hdźež su křiž powalili. W tachantskej cyrkwi su nimo toho njeznaći postawu swjateje Marije wonječesćili, kaž zdźěli minjenu njedźelu tachantski farar Wito Sćapan.
Ludźi w starobje zawěsćić
Drježdźany (dpa/SN). Lěwica w Sakskej žada sej konsekwency rosćaceje chudoby w starobje dla. Dale a wjace ludźi je wot zakładneho zawěsćenja w starobje wotwisnych, wujasni dźensa předsydka strony Susanne Schaper. Ličba potrjechenych hižo lěta stupa, minjeny čas pak je razantnje přiběrała. Schaper bě k temje małe naprašowanje w krajnym sejmje stajiła. „Předewšěm ludźo na wuchodźe trjebaja spušćomne zakonske rentowe zawěsćenje, dokelž tu mjenje ludźi hač na zapadźe zawodnu rentu abo pensiju dóstawa.“
Pospyt přewróta?
Moskwa (dpa/SN). Ruske wonkowne ministerstwo je wumjetowanja wotpokazało, zo planuja přewrót w něhdyšej sowjetskej republice Moldawskej. „Tajke twjerdźenja su absolutnje njewoprawnjene a njehodźa so dopokazać“, zwurazni rěčnica ministerstwa Maria Sacharowa. Prezidentka Moldawskeje, Maia Sandu, bě wčera před ruskimi pospytami přewróta warnowała. Sandu złožowaše so na dokumenty tajneje słužby, kotrež bě Moldawska njedawno wot susodneje Ukrainy dóstała.
Twarjenja w hubjenym stawje
