Za kóždeho něšto w poskitku
Turněraj konjaceho sporta w Holešowskej Dubrawce a Hórkach su zamołwići lětsa na september přestorčili. Helena Bětnarjec je so předsydu Njeswačanskich konjacych sportowcow Franka Lehdera mjez druhim za přičinu prašała.
Něhdy sće w běhu lěta dwaj turněraj zarjadowali, hłowny stajnje w juniju. Lětsa wuhotujeće jenož jedyn w septembrje.
F. Lehder: Smy swójbne towarstwo. Dokelž mamy w našich swójbach tójšto jubilejnych swjedźenjow a druhich swójbnych přičin dla smy so rozsudźili, lětsa jenož jedyn jěchanski a skakanski turněr přewjesć, a to 3. a 4. septembra w Holešowskej Dubrawce.
Što tam na přihladowarjow čaka?
F. Lehder: Stajamy swoje zarjadowanja pod zakładnu temu wólnočasny sport we wšěch jeho třoch fasetach: skakanje, klasiska dresura a jězdźenje ze zapřahami. Jězdźenje přez zadźěwki ze zapřahom poskićimy znowa njedźelu wječor. Pruwowanja w kategorijach E, A, L, M a S změjemy w skakanju kaž tež w dresurje. Ličimy z mnohimi wobdźělnikami. Myslu sej, zo budu wubědźowanja sobotu a njedźelu wot 7 do něhdźe 19 hodź.
Waš turněr je tajki prawy swójbny.
Za čistu Sprjewju kolesowałoj
Zapósłanča Zelenych w Sakskim krajnym sejmje Franziska Schubert wěnowaše zhromadnje z braniborskim kolegu Benjaminom Raschku swoju lětušu lětnju turu čistoće Sprjewje. Tak staj wot jednoho z jeje třoch žórłow w Neugersdorfje hač do Berlina podłu rěki kolesowałoj a sej staw na městnje wobhladałoj. Bianka Šeferowa je so z Franzisku Schubert rozmołwjała.
Kak staj ideju lětnjeje tury zrodźiłoj?
F. Schubert: Na wopyće pola Benjamina Raschki w Lubnjowje sym z nim mnohe zhromadnosće wotkryła. Nimo toho zo bydlu ja při žórle Sprjewje w Neugersdofje a wón w Błótach, zwjazuje nas předewšěm angažement za přirodu a wobswět. Wón zastupuje jón w braniborskim, ja w sakskim sejmje. Wo Sprjewi rěčo smój wězo tež jeje zežołtnjenje naspomniłoj – a ideja tajkeje tury bě zrodźena.
Kak čista je woda Sprjewje?
Přichodnje zaso něštoza dorosćenych
W swojej nowostce „Lizka wjaza kózlika“wěnuje so Měrka Mětowa dźěćom w prěnjej čitanskej starobje a młódšim. Cordula Ratajczakowa je so z awtorku rozmołwjała.
Što je Was pohnuło, něšto za najmłódšich čitarjow pisać?
M. Mětowa: Po tym zo sym knize za wjetše dźěći napisała, chcych rady tež hišće něšto młódšim dźěćom w jich maćeršćinje poskićić. Konkurenca na němskich wikach je jara wulka, tohodla běše mi wažne, serbskim dźěćom načasnu a realistisku stawiznu na lochke a trochu žortne wašnje zbližić. Snano dóstanu dźěći tak lóšt, tež dalše serbske knihi čitać. A ma to być nowostka, kotraž rozšěrja paletu serbskorěčnych dźěćacych temow. Wona hodźi so tele dny derje jako darik šulskim nowačkam. Dźakuju so Ludowemu nakładnistwu Domowina a lektorce Weronice Žurowej, zo je so předewzaće poradźiło.
Wo čo dźe w knize „Lizka wjaza kózlika“?
Mjez sobu serbsce rěča
Wot 5. do 7. awgusta wotměje so w Smjerdźacej, mjeztym 13. raz pospochi, wubědźowanje wohnjowych woborow w hašenju. Wo wobsahu a přihotach je so Alfons Handrik z nawodu wobory Norbertom Róblom rozmołwjał.
Čehodla wěnujeće lětušemu wubědźowanju wosebitu wažnosć?
N. Róbl: Kóždolětnje zwjazujemy wubědźowanje ze swjedźenjom tež za wobydlerjow wokolnych wsow. Tónkróć ma to zdobom być přihot klětušeho 60lětneho wobstaća našeje wobory.
Jako nawoda maće hłownu zamołwitosć. Kelko kameradow Was podpěruje?
N. Róbl: Spočatk lěta 2014 sym nawod přewzał. Wot toho časa twori něhdźe 40 wobornikow, z nich 24 aktiwnych, kruty, spušćomny cyłk. Prócujemy so přichodnje tež žony do našeje wobory dóstać.
Smjerdźečanscy wobornicy su přewažnje Serbja. Kotru rólu hraje serbskosć we wašich rjadach?
N. Róbl: Samozrozumliwje na najwšelakorišich zarjadowanjach mjez sobu serbujemy. Tola při wukubłanjach, hdyž je trjeba eksaktnu terminologiju wužiwać, staw so to němsce. Na gratowni kaž tež na wohnjowobornym jězdźidle pak mamy serbski napis.
Přećelstwo ze ZSW so derje wuwiwa
Wo dobre zhromadne dźěło mjez Zwjazkom serbskich wuměłcow (ZSW) a Zjednoćenstwom rusce rěčacych awtorow w Němskej prócuje so předsyda zjednoćenstwa, basnik, pianist a renoměrowany swingowy a tangowy hudźbnik Dmitrij Dragilew. Wón je so 1971 w Rize narodźił a bydli dźensa w Berlinje. Po lońšim wobdźělenju bě Dragilew lětsa znowa na Mjezynarodnym swjedźenju serbskeje poezije. Alfons Wićaz je so z nim rozmołwjał.
Bydliće w Berlinje a nawjedujeće tam Zjednoćenstwo rusce rěčacych awtorow w Němskej. Kotre nadawki je sej tele towarstwo stajiło a kotre móžnosće widźiće w zhromadnym dźěle ze ZSW?
Serbja njejsu objekty wustajeńcy
Wot 1. junija nawjeduje Tobias Hajdan wobłuk turizma w Marketingowej towaršnosći Hornja Łužica-Delnja Šleska (MGO). Bianca Šeferowa je so z nim wo nowych nadawkach a jeho předstawach rozmołwjała.
Kotre znajomosće maće jako nowy nawoda wobłuka marketinga turizma w MGO?
T. Hajdan: Běch w Drježdźanskim Swiss-hotelu zamołwity za marketing a předań, hdźež sym turistiski wobłuk jara derje zeznał. Dokelž so za region horju, sym so pola MGO požadał.
Kotrym nadawkam chceće so wěnować?
T. Hajdan: Zhromadnje z nawodu MGO dźěłamoj na nowym logu. Tež internetna prezenca ma so nuznje změnić. Stara njewotpowěduje tomu, štož turist wočakuje. Analyzujemy tuchwilu přeća turistow. Chcemy docpěć, zo zajimc wšitko z mało klikami docpěje. Dale dźěłamy w MGO na nowym dowolowym magacinje, kotryž měł w nowembrje wuńć. Zešiwk ma dóstać nowy přewidny design. Z nim móžemy potom na wšelakich wikach spočatk přichodneho lěta za region wabić.
Kak chceće jako zamołwity wobłuk turizma dale wuwiwać?
Próstwa móže tež kuriozna być
W lětušim etaće Załožby za serbski lud zbywaja hišće pjenjezy za projekty. Cordula Ratajczakowa je so ze zastupowacej direktorku Michaelu Mošowej rozmołwjała, što chcedźa z tymile srědkami spěchować a što so přichodnje nastupajo projektowe spěchowanje změni.
Załožba ma zbywace pjenjezy a njewě, dokal z nimi – rědka to powěsć. Što za tym tči?
M. Mošowa: Na zakładźe wotličenja lońšeho etata smy zwěsćili, zo mamy hišće pjenjezy. A serbscy zastupjerjo w załožbowej radźe, mjez nimi wosebje tež dotalny předsyda rady a přichodny direktor Załožby za serbski lud Jan Budar, su sej wuwojowali, zo maja so z tutymi srědkami swobodne projekty spěchować. A tak je to załožbowa rada na aprylskim posedźenju wobzamknyła. Mamy tuž nětko mały přidatny hornc 30 000 eurow za projekty. Wokomiknita situacija pak je tajka, zo předležace próstwy tónle hornc njewučerpaja.
Kajke próstwy sej přejeće?
Rěčne lěhwo SŠT wulce požadane
Sobotu zahaji so lětuše rěčne lěhwo Serbskeho šulskeho towarstwa. Milenka Rječcyna je so z jeho předsydku Ludmilu Budarjowej rozmołwjała.
Što běše při přihotach na lětuše lěhwo hinak hač dotal?
L. Budarjowa: Tajki wulki nawal zajimcow njeběchmy wočakowali. Lětsa wobdźěli so 54 dźěći a młodostnych 4. do 10. lětnika na rěčnym lěhwje SŠT. Mjez wobdźělnikami je 43 hólcow a jědnaće holcow. Woni su šulerjo našich serbskich zakładnych a wyšich šulow kaž tež Serbskeho gymnazija.
Zwotkel přińdźe tajki wulki zajim?
L. Budarjowa: Po Serbach je so rozpowědało, zo skićimy z rěčnym lěhwom dźěćom a młodostnym składnosć serbskorěčneje zabawy, při čimž móža so zdobom wočerstwjeć. Zarjadujemy tež zaso powabliwy program.
Kotre budu wjerški?
Zhromadna syć je bytostna
Peter Wittig je so w Drježdźanach narodźił a bydli dźensa w němskej stolicy, w Berlinje. Wón je režiser, docent za dźiwadło a pisa zdobom dźiwadłowe kruchi. We wobłuku 38. mjezynarodneho swjedźenja serbskeje poezije, na kotrymž je sobu skutkował, je so Alfons Wićaz z nim rozmołwjał.
Wudźeržujeće hižo dlěje dobre zwiski k Zwjazkej serbskich wuměłcow a sće jeho čłon. Kak je k tomu dóšło?
P. Wittig: Prěnje styki nawjazach 1976 na Festiwalu serbskeje kultury. Tam zeznajomich so z krasnym oratorijom „Nalěćo“ Korle Awgusta Kocora a Handrija Zejlerja. To je dźensa jedna z mojich najwoblubowanišich hudźbnych twórbow. Na tačel přewšo rady słucham. W lěće 1990 sym prěni króć w Budyskim Němsko-Serbskim ludowym dźiwadle inscenował, sydom lět pozdźišo z operu Dmitrija Kabalewskeho „Colas Breugnon“ dalši króć. To bě prěnje předstajenje w Němskej. Sym kruch do němčiny přełožił. W lěće 2000 inscenowach Detlefa Kobjelowu operu „Lessing Goes Opera oder Die Liebenden von Ephesos“. A na to sym zhromadnje z Detlefom Kobjelu a Wernerom Měškankom „Błótowsku operetu“ spisał. Prapremjera bě w Budyšinje.
Dwurěčnosćna swjedźenju samozrozumliwa
Po lěće 2008 w Sulšecach je město Kulow znowa hosćićel Krabatoweho swjedźenja, tónraz w měsće samym. Wo přihotach a wobsahach wulkeho podawka wot 12. do 14. awgusta je so Andreas Kirschke ze zamołwitej za kulturne dźěło w měsće Beatu Hufnagel rozmołwjał.
Kajke wužadanje je Krabatowy swjedźeń?
B. Hufnagel: Jara wulke wužadanje. Wot lońšeho awgusta jón přihotujemy. Tehdy je prěnja dźěłowa skupina nastała. W měšćanskim zarjadnistwje smy zamołwitosće rozdźělili. Mjeztym wobsteja wjacore mjeńše skupiny. Loni w oktobrje bě wobydlerska zhromadźizna, na kotrejž smy koncept a časowy plan předstajili.
Kajki je aktualny staw přihotow?
B. Hufnagel: Tuchwilu wšitke jednotliwe dypki nadrobnje wothłosujemy. Ćišćernja wokomiknje flajer ćišći. Nimo nadrobneho programa wopřijima wón dokładny plan nutřkowneho města, tak zo budu so wopytowarjo derje orientować móc.
Kak Krabatowy swjedźeń financujeće?
