5. měrca před 70 lětami zemrě w swojej dači w Kunzewje pola Moskwy Józef ­Wissarijonowič Stalin, kotryž bě wot 1922 generalny sekretar Komunistiskeje strony Sowjetskeho zwjazka (KSSZ) a pozdźišo tež ministerski prezident prěnjeho socialistiskeho kraja. Nad nim knježeše Stalin diktatorisce a nawjedowaše tež dobyćersce Wulku wótčinsku wójnu Sowjetskeho zwjazka přećiwo fašistiskej Němskej. 1. měrca 1953 schori Stalin ­ćežko na arterioklerosy (Arterienverkalkung) a dalšich chorosćow. Wón wosta pjeć dnjow nimale bjez lěkarskeje pomocy, dokelž bě wón swojich židowskich lěkarjow krótko do toho zajeć dał. Tukaše na nich, zo chcedźa jeho morić. Druzy lěkarjo njezwěrichu so jemu prawje pomhać. Čłonojo politběrowa KSSZ bojachu so jeho a njestarachu so pomocliwje wo njeho. Stalin wosta spjace samo dźeń bjez dohlada a zemrě na powjetšenje ­wutroby. Jeho dźowka Swjetlana a syn Wasili, general lětarstwa, wumje­towaštaj čłonam politběrowa, wosebje nutřkownemu ministrej Lawrjentijej ­Berijej, zo su nana morili, dokelž jemu dobru lěkarsku pomoc njeposkićachu.