Kijew/Washington (dpa/SN). USA wojersku pomoc na dobro Ukrainy dale zwyša. Nimo toho maja so diplomaća USA hišće tutón tydźeń do Kijewa nawróćić. To rozprawjeja medije po wopyće wonkowneho ministra Antonyja Blinkena a zakitowanskeho ministra Lloyda Austina w Ukra­inje. W Kijewje běštaj so wonaj mjez druhim z ukrainskim prezidentom Wolodymyrom Zelenskym zetkałoj. Blinken bě Zelenskemu w rozmołwje přilubił, zo so diplomaća, kotřiž běchu do zahajenja ruskeje inwazije Ukrainu wopušćili, hišće tutón tydźeń nawróća. Tole je „sylne poselstwo solidarity zjednoćenych statow“. Prezident Joe Biden chce bórze Bridget Brink za nowu wulkopósłanču USA w Ukrainje powołać. Brink je tuchwilu pósłanča USA w Słowakskej.

Wojersku pomoc za Ukrainu a 15 dalše wuchodoeuropske kraje zwyša wo dalše 713 milionow dolarow (662 milionow eurow), nowinarjo pisaja. Z tym chcedźa ukrainskemu wójsku zmóžnić, so na nowe moderne brónjowe systemy přestajić, zakitowanske ministerstwo zdźěla.

Wolóženje po prezidentskich wólbach w Francoskej – prawicarjo sylni

Paris (dpa/SN). Kontinuita w Francoskej, wodychnjenje w Europje: Wolerki a wolerjo w Francoskej su z wjetšinu nacionalistku a antieuropsku politikarku Marine Le Pen wotpokazali a Europje přichileneho Emmanuela Macrona znowa za swojeho prezidenta wuzwolili. K politiskemu zemjerženju, kotrež by dobyće prawicarki w Berlinje a Brüsselu zbudźiło, njeje dóšło. Při wšěm su francoscy prawicarjo historisce dobry wuslědk docpěli, štož pokazuje na hłuboke pačenje francoskeje towaršnosće. Nětko hladaja wšitcy na wólby parlamenta w juniju.

Emmanuel Macron je jasny dobyćer prezidentskich wólbow. 44lětny je so po informacijach nutřkowneho ministerstwa z 58,55 procentami přećiwo Le Pen přesadźił. 53lětna zdoby sej 41,45 procentow hłosow. Wona móžeše so porno wólbam 2017 wo nimale wosom procentow polěpšić, jako dósta 33,9 procentow.

Waršawa (dpa/SN). W Pólskej starosća so wospjet wo žiwjenje wjacorych hórnikow. Wysoka koncentracija metana je pytanje za dźesać zhubjenymi nachwilnje haćiła, dokelž hrožeše strach rozbuchnjenja. Za čas zarženja zemje w juhopólskich wuhlowych podkopkach Zofiówka w Jatsrębie-Zdróju bě 52 hórnikow pod zemju. 42 z nich so sami wuswobodźichu. Wuchowarjo móžachu so k štyrjom zasypanym předrěć, kotřiž pak hižo wjace njereagowachu. Na to dowjezechu jednoho z nich na powjerch, hdźež móžeše lěkar jenož hišće smjerć 36lětneho nana dweju dźěći zwěsćić. Hdźe móže šěsć zhubjenych hórnikow być, dotal hišće njewědźa, hórniske předewzaće zdźěli.

Hakle minjenu srjedu bě w podkopkach samsneho šleskeho hórniskeho předewzaća dwójce metanowy płun rozbuchnył. Pjeć hórnikow móžachu jenož hišće mortwych chować. Za sydom dalšimi dyrbjachu pytać přestać, dokelž hrožeše strach dalšich detonacijow. Kaž nawodnistwo zawoda informuje, klumpaja čerstwy powětr do podkopkow, zo bychu strach detonacijow znižili. To pak płaći wuchowarjow wjele chwile.

Sezonu dujerjow na wěži su wčera w Kamjenicy zahajili. Na balkonje Stareje radnicy je pozawnowy chór z Grüna zahudźił. Hač do adwentneho časa chcedźa hudźbnicy Kamjeničanskeje wosady a wo­kolnych wosadow kóždu sobotu rano ­połhodźinski koncert poskićić. Zaklinčeć maja twórby Johanna Sebastiana Bacha runje tak kaž moderne kruchi. Tradicija hudźenja na wěži saha hač do 1980tych lět a nasta na priwatnu iniciatiwu.

Awto z hata wućahnyli su wohnjowi wobornicy w sauerlandskim Lennestedtće. Wóz bě wčera rano do hata zajěł, dokelž bě wobsedźer na to zabył, ručne borzdźidło kruće přićahnyć. Kaž rěčnik wohnjoweje wobory zdźěla, so akcija jenož z pomocu dweju nurjakow towaršnosće za wuchowanje žiwjenja poradźi. Tójšto wćipnych wuchowansku akciju z 45 pomocnikami wobkedźbowaše.