Lokalne pady r-hódnotu wobwliwuja
Berlin (dpa/SN). Dołhi čas bě w zwisku z koronawirusom mjenowana reprodukciska hódnota (r-hódnota) pod 1. Tak je Němska koronakrizu po wšěm zdaću jara derje zmištrowała. Nětko pak je so reprodukciska hódnota znowa razantnje zwyšiła, štož zaleži na wjacorych lokalnych podawkach w Sewjerorynsko-Westfalskej, Berlinje a Saksko-Anhaltskej. Wčera wozjewi Roberta Kochowy institut (RKI) w Berlinje hódnotu 2,76. To woznamjenja, zo je jedyn inficěrowany dwě do tři wosoby natyknył. „Lokalne pady wulkeje ličby infekcijow, kaž w mjasowej fabrice Tönnies w sewjerorynsko-westfalskim wokrjesu Gütersloh, r-hódnotu wulce wobwliwuja, byrnjež ličby na snadnym niwowje byli“, institut zdźěli. W saksko-anhaltskim Magdeburgu su na někotrych šulach inficěrowanych zwěsćili. A w Berlinje-Neuköllnje wuchadźeja wjacore natyknjenja z nabožneho zhromadźenstwa.
Postupuje přećiwo neonacijam
Berlin (dpa/SN). Zwjazkowy nutřkowny minister Horst Seehofer (CSU) je prawicarskoekstremistiske zjednoćenstwo „Nordadler“ zakazał. „Wot ranja přewjedujemy policajske naprawy w štyrjoch zwjazkowych krajach“, zdźěli dźensa rěčnik ministerstwa Steve Alter. Skupina neonacijow agěruje předewšěm w syći. „Prawicarski ekstremizm a antisemitizm nimatej tež w interneće žane městno.“ Zastojnicy přepytuja městnosće w Sewjerorynsko-Westfalskej, Sakskej, Braniborskej a Delnjej Sakskej.
Skupina „Nordadler“ postupuje po nacionalsocialistiskej ideologiji a wuznawa so k Adolfej Hitlerej. Tež dalšich zastupjerjow nacirežima sej waži a wužiwa jeho symbole kaž tež rěč. Zdobom planuje nacionalsocialistiski sydlenski projekt na wjesnych kónčinach. Nawoda je w internetnej syći tež sympatije za nadpad na Hallesku synagogu zwuraznił. Při atentaće loni w oktobrje bě 28lětny spytał so do synagogi zadobyć, štož so jemu njeporadźi. Na to je dwě wosobje morił, za čož ma so w juliju před sudnistwom zamołwić.
Dyrbimy wšo nachwatać?
Pilnje škódnu ambroziju plěli
To a tamne (23.06.20)
Trójce klepać, wótře „abrakadabra“ wołać a so spěšnje zminyć: 13lětny hólčec w zwjazkowym kraju USA Delaware je sej přał, zo roznošowar póšty tak jedna. A póstownica je spodźiwne přeće woprawdźe chutnje brała, je runje tak postupowała a samo přez žiwy płót skočiła. Wobkedźbowanska kamera bě wšitko natočiła, a tak je widejo mjeztym hit na Facebooku. Mać hólčeca ma „wulki respekt před roznošowarku. Byrnjež zawěsće wjele stresa měła, je wona přeću mojeho syna z energiju a lóštom wotpowědowała. To mje wjeseli.“
Wosebje chrobłeho paducha je policija nětko w Nürnbergu lepiła. Jako jeho zastojnikaj sputaneho z drogerije wodźeštaj, je sej 28lětny přiwšěm hišće blešku parfima do zaka tyknył. Hakle na straži so jemu bleška z drohotnymi kapkami ze zaka suny. Kak bě sputany do regala sahnyć móhł, nochcyše pakostnik wězo přeradźić.
Žada sej měr w Libyskej
Rom (B/SN). Bamž Franciskus je so na Bože ćěło njedźelu připołdnju w krótkim prědowanju a po modlitwje Jandźelknjeza na swětowe zhromadźenstwo ze žadanjom wobroćił, zastajić namóc w Libyskej. Po jeho słowach steji sewjeroafriski kraj krótko před eskalaciju, dokelž skradźu dźeń a wjace bróni a wojowarjow dowožuja. Swjaty wótc wuwiće z wulkej starosću a bolosću sćěhuje.
Chinscy křesćenjo solidarni
„Běch wo sebi samym šokowany“
Iniciatiwa šulerskeje rady wokrjesa Sprjewja-Nysa za dwurěčne šulske wuswědčenje je wotkryła, zo posrědkowana wěda wo našim ludźe njespokoja.
Podstupim (SN/at). „Wšitke šule w serbskim sydlenskim rumje měli dwurěčne wuswědčenja wudźěleć. To je mała forma, zo byštej serbska rěč a kultura žiwej wostałoj“, rjekny Justin Pigol z Bórkowskeje šule „Mina Witkojc“ minjeny pjatk na posedźenju braniborskeje Rady za naležnosće Serbow. Běchu jeho přeprosyli, iniciatiwu šulerskeje rady wokrjesa Sprjewja-Nysa (SPN) předstajić.
Knježerstwo bjez opozicije
Běłohród (dpa/SN). Jenož mało wobydlerjow Serbiskeje je so wčera na wólbach noweho parlamenta wobdźěliło. Kaž wólbni wobkedźbowarjo wozjewichu, bě jich jenož něhdźe 48 do 49 procentow wólbokmanych. Najwažniše strony opozicije chcychu wólby bojkotować a njejsu nastupili. Kaž wočakowane, je prawicarskonarodna strona SNS z prezidentom Aleksandarom Vučićom 63 procentow hłosow wolerjow nažnjała.
Stuttgart po wukročenjach
Stuttgart (dpa/SN). Zwjazkowy nutřkowny minister Horst Seehofer (CSU) chce sej po wukročenjach w Stuttgarće wobraz wo połoženju sčinić, kaž dźensa badensko-württembergske nutřkowne ministerstwo zdźěli. Připołdnju jeho tam wočakowachu. W nocy na njedźelu bě so po informacijach 400 do 500 ludźi w stolicy zwjazkoweho kraja na namócnych rozestajenjach wobdźěliło. Znajmjeńša 19 zastojnikow so zrani. Cyłkownje 24 ludźi je policija nachwilnje zajała.
Maja noweho kandidata
Moderator Serbskeho rozhłosa Beno Bělk je dźensa posledni raz ...
Gastronomija dale pod wulkim ćišćom
Drježdźany (dpa/SN). Gastronomiska a hotelowa branša w Sakskej je tež po wotewrjenju mnohich zawodow w meji dale pod wulkim ćišćom. „Kriza hišće nimo njeje“, rjekny Axel Klein, hłowny jednaćel zwjazka hosćencarjow a hotelownikow Dehoga, minjeny pjatk w Drježdźanach. Wón pokaza na wuslědk naprašowanja mjez nimale 600 gastronomiskimi zawodami Sakskeje, při čimž bě 80 procentow woprašanych rjekło, zo njemóža pod aktualnymi wobstejnosćemi hospodarsce dźěłać. Liča tuž lětsa z jenož połojcu hewak nadźěłaneho wobrota. Nadźiju čerpa branša z nachwilnje zniženeho nadhódnotoweho dawka a z konjunkturneho paketa zwjazkoweho knježerstwa.
Wot 15. meje smědźa hosćency, hotele a dowolowe bydlenja pod hygienowymi postajenjemi zaso hosći witać. Tři štwórćiny woprašanych pak skorža, zo njebudu nadźije na dobry wobrot napołoženych wobmjezowanjow dla dotal spjelnjene. Dochody su wo wjele snadniše hač loni w tym času.
