To a tamne (11.06.20)
Swojorazne zynčenje je wot najnowšeho wokoło swětoznateho mosta Golden Gate Bridge w San Franciscu słyšeć. „Wina“ na zwukach 83 lět stareje woclaneje konstrukcije je nowe wobłoženje, kotrež tam runje zatwarjeja. Reakcije wobydlerjow sahaja wot „grawoćiwe“ hač k „spěwej jandźelow“. Nowe wobłoženje je dźěl projekta, zo móhli metalowe saki přećiwo sebjemordarjam připrawić.
Lubosć k čerwjenym sportowym awtam typa Ferrari je 45lětnemu mužej w Duisburgu mjerzanje z policiju wunjesła. Wón ma pokutu płaćić, dokelž je swój trjebany Toyota na nimale originalny „fake-Ferrari“ přetwarił. Policajskej patruli bě awto w Duisburgu napadnyło. Na a w Toyoće bě na wjacorych městnach značka Ferrari připrawjena, kiž wšak je kruće škitana. Muž dyrbi awto zaso na originalny staw změnić.
„Dyrbjeli awtonomny cyłk być“
Serbske Nowiny w rozmołwje z Markom Suchim, nowym předsydu Rady za serbske naležnosće Sakskeje
Sće sej jónu sylnu, nazhonitu serbsku radu přał, kotraž zapósłancow poradźuje. Bu to docpěte?
M. Suchy: Bjezdwěla haj, měšeńca staroby, zajimow, powołanskeho pochada je zajimawa dosć, zo móžemy zapósłancow a knježerstwo wotpowědnje poradźować. Jeli to raz njedosaha, budźemy so hišće dalšich fachowcow prašeć, prjedy hač swoje stejišćo zapodamy.
Njepoćežuje dźěło rady fakt, zo njejsu wšitke serbske kónčiny w njej zastupjene?
M. Suchy: Wšitke serbske kónčiny tež dotal zastupjene njeběchu. Wažne drje tež njeje, zo z ćežišćowych kónčin něchtó přińdźe. Bytostne skerje je, zo ćežišćowe kónčiny z jich problemami w radźe wobkedźbujemy a je we wotpowědnych aktiwitach zapřijimamy.
Strukturnu změnu po kóncu wudobywanja brunicy na přikład?
Tematizuja koronakrizu
Drježdźany (dpa/SN). Sakski krajny sejm je dźensa wuskutki koronakrizy rozjimał. W aktualnej hodźinje dźěše wo próstwu Zelenych, kotřiž sej žadaja mjezy w Europje zaso wotewrěć. SPD měješe za wažne wo škiće socialnych zarjadnišćow a iniciatiwow za čas korony rěčeć. AfD pak chcyše šćěpjensku winowatosć w zwisku z koronawirusom do debaty zapřijeć. Dale steješe škitne zakryće huby a nosa na dnjowym porjedźe.
Zwjazkowy kabinet wuradźuje
Berlin (dpa/SN). Nutřkowny minister Horst Seehofer (CSU) chcyše dźensa zwjazkowy kabinet wo nowych prawidłach hladajo na jězby do Němskeje informować. Wot 16. junija ma – najebać někotre wuwzaća – wšitko zaso tak běžeć kaž do wobmjezowanjow, kotrež wotsrjedź měrca płaća. Agrarna ministerka Julia Klöckner (CDU) předstaji k tomu tež nowe prawidła nastupajo dalše dźěło sezonalnych pomocnikow w ratarstwje.
Smjerć debatu wujewiła
Swójski puć Durinskeje
Erfurt (dpa/SN). Wjace swójskeje zamołwitosće wobydlerjow žadaše sej durinski ministerski prezident Bodo Ramelow (Lěwica) před tydźenjomaj, z čimž je wulke diskusije zbudźił. Wčera tamniše krajne knježerstwo wobzamkny, zo wobmjezowanja kontaktow koronapandemije dla hižo njepłaća wot 13. junija. Nětko započina so faza, w kotrejž zawrjene wobłuki wočinja. W tym padźe je tež zaso normalny žiwjenski rum wobydlerjow wažny.
Poprawom su Zwjazk a zwjazkowe kraje wobzamkli, zo maja so kontakty hač do 20. junija wobmjezować. Durinska kroči potajkim po swójskim puću. Přiwšěm maja zarjadnišća kraja hygieniske koncepty wobkedźbować, a ludźo trjebaja dale škit za hubu a nós we wobchodach a w zjawnych wobchadnych srědkach.
Swědomiće planować
Za nowe prawidła demonstracije nastupajo
Berlin (dpa/SN). Po wulkich demonstracijach přećiwo rasizmej minjeny kónc tydźenja jewja so přiběrajcy žadanja za nowe koncepty tajkich wulkozarjadowanjow. W Berlinje žadataj sej předsydka frakcije Zelenych Antje Kapek a nutřkowny politikar SPD Tom Schreiber jasne prawidła za přichodne demonstracije.
Na sobotnu demonstraciju na Berlinskim Alexanderowym naměsće bě něhdźe 15 000 ludźi přišło, wjele wjace hač wočakowane. Za přichodny kónc tydźenja su dalše zarjadowanja planowane. Njedźelu chce zwjazk „Njedźělomne“ z wulkim čłowječim rjećazom přećiwo socialnej njesprawnosći a rasizmej protestować. 20. junija wotměje so wulka demonstracija na Podstupimskim naměsće přećiwo přiběracym podružam.
To a tamne (10.06.20)
Mops Edda, mjeztym Wilma, sudnistwo dale zaběra. Zastojnik města Ahlena bě psa zadołženej swójbje sćazał a jeho w interneće jako pozdatnje stroweho poskićił. Nowa wobsedźerka pak bě cyle hinašeho měnjenja, dokelž dyrbješe Wilmu wjacore razy na wočomaj operować dać. Nětko ma Münsterske sudnistwo pad na blidźe a je posudźowarja wo pomoc prosyło. Zwadna sudniska naležnosć wučinja mjeztym něhdźe 20 000 eurow.
Wulkeje podobnosće z turkowskim starom Enginom Altanom Düzyatanom dla je město Ordu bustu wojaka z 13. lětstotka zaso wotstroniło. Poprawom dyrbješe skulptura nana załožerja Osmaniskeho mócnarstwa zwobraznjeć. Je pak skerje postawa dźiwadźelnika, kiž jeho w telewizijnej seriji předstaja. Měšćanske zarjadnistwo je so na tym postorčiło a bustu wotstronić dało.
Rozsud na september přestorčeny
Za minjenu sobotu předwidźany wosebity zjězd Južnoschleswigskeho wolerskeho zwjazka (SSW) njeje so aktualnje płaćiwych wobmjezowanjow koronapandemije dla wotměł. Jako hłowne ćežišćo chcyše SSW wobzamknyć, hač so na klětušich wólbach zwjazkoweho sejma wobdźěli.
Flensburg (SN/at). Prěnjotny termin zjězda 6. junija dodźeržeć njebě móžno. Kaž krajny sekretar SSW Martin Lorenzen rjekny, chcedźa wažnu naležnosć na stronskim zjězdźe 19. septembra w Flensburgu rozjimać a wobzamknyć. „Korona je kaž wšudźe druhdźe tež dźěło SSW zlemiła. Wot měrca njejsmy w stronje žane zarjadowanja ze sobustawami přewjedli. Hakle tydźenja smy w małym kruhu zaso fyzisce wuradźowali“, wopisuje wón aktualne połoženje.
Eksport dramatisce woteběrał
Wiesbaden (dpa/SN). Eksport němskich tworow do wukraja je jako sćěh koronakrizy w aprylu dramatisce woteběrał. Hódnota wuwožowanych tworow je porno lońšemu aprylej wo 31,1 procent na 75,7 miliardow eurow spadnyła, štož je najwjace po zahajenju statistiki wonkowneho wikowanja w lěće 1950. Zawrjene mjezy runje tež europskich krajow a wobmjezowanja wikowanskich a pućowanskich móžnosćow na swěće su transport tworow dramatisce haćili kaž Zwjazkowy statistiski zarjad zdźěli.
Rěča wo wotbrónjenju
Washington (dpa/SN). USA a Ruska su so na nowe rozmołwy wo atomarnym wotbrónjenju dojednali. Społnomócnjeny knježerstwa USA za prašenja wotbrónjenja Marshall Billingslea informuje, zo je ze zastupowacym wonkownym ministrom Ruskeje Sergejom Rjabkowom čas a městnosć jednanjow wujednał. China je tohorunja přeprošena. W februaru 2021 poslednje zrěčenje wo wotbrónjenju mjez USA a Ruskej wuběži. Ruska bě stajnje zaso před nowym atomarnym napřemobrónjenjom warnowała.
Kak miliardy eurow rozdźělić?
Dwanaće podkopkow zawrěć dyrbjeli
Waršawa (dpa/SN). Po wudyrjenju koronawirusa mjez hórnikami w Šleskej je Pólska dwanaće podkopkow kamjentneho wuhla na přichodne tři tydźenje zawrěła. Hórnicy dóstanu w tym času swoju połnu mzdu, zdźěli financny minister Jacek Sasin wčera we Waršawje. Dwaj podkopkaj hórniskeho předewzaća Jastrzębska Spółka Węglowa kaž tež dźesać zawodow koncerna PGG je potrjechenych.
Po informacijach ministra za strowotnistwo Łukasza Szumowskeho budu w času hač do znowawotewrjenja telko hórnikow kaž móžno na koronawirus testować. „Chcemy podkopki před njekontrolowanym rozpřestrěćom koronawirusa škitać a docpěć, zo móža hórnicy ručež móžno zaso na dźěło přińć.“
Minjenu sobotu běchu po informacijach pólskeho strowotniskeho ministerstwa po cyłym kraju 576 nowonatyknjenjow zwěsćili. Je to druha najwjetša ličba po wudyrjenju epidemije. Njedźelu su 575 dalšich nowych padow registrowali. Ćežišćo ležeše na woběmaj dnjomaj w šleskej hórniskej kónčinje. Wčera, póndźelu, bě wot 219 nowozwěsćenych infekcijow 151 w Šleskej.
