Baje, dorost a jubilej
Telewizijny magacin Łužyca wěnuje so w juniju hłownje předstajenju „Wukšadnjony pókład“, lětušej inscenaciji w rjedźe Błótowskich powěsćowych nocow. Nimo toho pokazaja přinoškaj „50. jubilej Mósćańskego swajźbaŕskego pśeśěga“ a „25. dny serbskeho dźěćaceho dźiwadła w Budyšinje“. We wobłuku rubriki „Paula wari“ předstaja dalši serbski recept.
Telewizija RBB pokaza Łužycu jutře, sobotu, w 13.35 hodź. Wospjetowanje na samsnym sćelaku slěduje zajutřišim w 7.30 hodź. Telewizija MDR wusyła magacin přichodnu sobotu, 28. junija, w 12 hodź. W mediatece ARD je Łužyca wot jutřišeho cyłe lěto kóždy čas přistupna.
Rěčne hnězdo w fokusu
Telewizijny magacin Wuhladko wěnuje so w juniju hłownje projektej Domoj, kotryž ma wobdźělnikam zmóžnić, w dźewjeć měsacach serbšćinu nawuknyć. Dalšej přinoškaj wobswětlujetej kónc šamotownje we Wětrowje a přihoty na 15. mjezynarodny folklorny festiwal Łužica – Łužyca– Lausitz“. Nimo toho portretuja młodu Serbowku, Annabell Wandeltec, kotraž je sej jako samostatna pohrjebniska fachowča „powołanski són spjelniła“.
Telewizija MDR pokaza Wuhladko jutře, sobotu, w 12 hodź. Wospjetowanje na samsnym sćelaku slěduje póndźelu, 16. junija, w 6.50 hodź. Telewizija RBB wusyła magacin sobotu, 14. junija, w 13.30 hodź. W mediatece ARD je Wuhladko wot jutřišeho cyłe lěto kóždy čas přistupne.
„Dolina smjerće“
Dźensa wabi idyliski doł podłu Klóšterskeje wody do wuchodźowanja, před 80 lětami běše wony blak hela na zemi – Lipjo před wrotami klóštra Marijina hwězda w Pančicach-Kukowje. 27. apryla 1945 sta so wuski kotoł ze smjertnymi paslemi a za sta pólskich wojakow z poslednjej staciju – z „Dolinu smjerće“. Z pomocu hišće žiwych časowych swědkow a historikarjow z Pólskeje a Němskeje poda so mejske wudaće telewizijneho magacina Wuhladko na historiske slědy jednoho z najkrawnišich bitwišćow Druheje swětoweje wójny. „W mojim žiwjenju njeje so mi ničo tak hłuboko zašćěpiło, kaž tute poslednje dny w aprylu 1945. Běchu tak surowe, zo so mi dźensa hišće wo tym dźije.“ Tak rysuje 90lětny Jurij Nuk wone dny. „Sym tole z wosom lětami wšitko sobu dožiwił, ze swojim dźědom a wowku. Wojacy SS přijědźechu a wšo zatřělichu, štož bě hišće žiwe“, dopomina so Beno Młynk z Hórkow. „Mój nan je 1945 tu w 2. pólskej armeji wojował. Z jeho regimenta je wot 1 700 wojakow jenož něhdźe 300 přežiwiło“, powěda potomnik pólskeho wojaka Jerzy Warszawski.
Delnjołužiske jutry
„Jatšy we Łužycy“ rěka reportaža, z kotrejž telewizijny magacin Łužyca w aprylu stare, zdźěla nimale pozabyte a poněčim znowa wožiwjene nałožki kołowokoło jutrow w Delnjej Łužicy wotbłyšćuje. Jutry su „symbol kontinuity a změny za hłuboku zwjazanosć Serbow ze swojimi stawiznami kaž tež mocy zhromadnosće, kotraž nosy rituale do žiweho přichoda“. Wosebje w fokusu steja „młodźi ludźo, kotřiž sej starodawne wašnja přiswojeja a tak tradiciju a modernu zjednoćeja“.
Telewizija RBB wusyła Łužycu jutře, sobotu, w 13.25 hodź. Wospjetowanje na samsnym sćelaku slěduje zajutřišim, njedźelu, w 7.30 hodź. Telewizija MDR pokaza magacin jutře, sobotu, w 12 hodź. W mediatece ARD je Łužyca wot jutřišeho cyłe lěto kóždy čas přistupna.
Rozrost a portrety
Ćežišćo telewizijneho magacina Wuhladko w aprylu je powjetšacy so serbski sydlenski rum. Wotpowědny přinošk wobswětluje přičiny a předstaja wsy, kotrež chcedźa so na sewjeru wokrjesa Budyšin tomule rumej přizamknyć. Dale portretuja znateho serbskeho rězbarja Mikławša Dyrlicha a skerje njeznateho resp. pozabyteho wusahowaceho serbskeho wědomostnika Alwina Mitaša. Nimo toho předstaja najmłódšu gmejnu w Sakskej Ralbicy-Róžant.
Telewizija MDR wusyła Wuhladko jutře, sobotu, w 12 hodź. Wospjetowanje na samsnym sćelaku slěduje póndźelu, 7. apryla, w 6.50 hodź. Telewizija RBB pokaza magacin sobotu, 12. apryla, w 13.35 hodź. W mediatece ARD je aktualne Wuhladko wot jutřišeho cyłe lěto přistupne.
Digitalizacija a tykanc
Digitalizacija je ćežišćo telewizijneho magacina Łužyca w měrcu. Mjez druhim wěnuja so aktualnymaj serbskimaj předčitanskimaj funkcijomaj a přichodnje móžnej nawigaciji w serbšćinje. Dale předstaja projekt „Drastwa digitalnje“ kaž tež kompjuteroweho pioněra Mikławša Joachima Wićaza. Nimo toho wobswětla we wobłuku rjadu „Paula wari“ zwisk mjez „zymnej mulku“ a serbskej tradiciju.
Telewizija RBB pokazuje Łužycu jutře, sobotu, w 13.35 hodź. Wospjetowanje na samsnym sćelaku slěduje srjedu, 19. měrca, w 2.55 hodź. Telewizija MDR wusyła magacin sobotu, 22. měrca, w 12 hodź. W mediatece ARD je Łužyca wot jutřišeho cyłe lěto kóždy čas přistupna.
Nory, zyma a worjoł
„Pjaty počas“ je z ćežišćom telewizijneho magacina Wuhladko w měrcu. Wosebje w fokusu stejitej hornjołužiskej srjedźišći norow Kulow a Njebjelčicy. Dalšej přinoškaj wěnuja rozdźělnymaj aspektomaj rozžohnowacej so zymje. Pod hesłom „Dźěłać w zymskej idylce“ portretuja młodu Serbowku Lizu-Marju Cyžec, kotraž dźěła tuchwilu w hotelu w Alpach. Trochu bliže, mjenujcy w Sulšecach, wotmě so njedawno prěni serbski biatlon jako „Zymski sport bjeze sněha“. Kamerownicy su wobrazy zapopadnyli a sposrědkuja impresije. Nimo toho wobswětla archeologisku sensaciju, kotraž na „Serbske korjenje němskeho woponoweho zwěrjeća“, mjenujcy mórskeho worjoła, pokazuje.
Telewizija MDR wusyła Wuhladko jutře, sobotu, w 12 hodź. Wospjetowanje na samsnym sćelaku slěduje póndźelu, 3. měrca, w 6.50 hodź. Telewizija RBB pokaza magacin sobotu, 8. měrca, w 13.25 hodź. W mediatece ARD je Wuhladko wot jutřišeho cyłe lěto kóždy čas přistupne.
Wólby, šule a portretaj
Bližace so wólby Zwjazkoweho sejma su z ćežišćom telewizijneho wusyłanja magacina Wuhladko w februaru. Wosebje w fokusu steja přihoty w zarjadnistwach dwurěčnych komunow, kotrež maja wólbne podłožki rozesłać kaž tež wólbne lokale a wotpowědny personal organizować. Dalša tema su prawicarske a antiserbske tendency, kajkež serbscy młodostni hižo dlěje nic jenož w towaršnosći, ale přiběrajcy tež na dwurěčnych šulach regiona wobkedźbuja.
Wusyłanje wudospołnitej portretaj. Pod hesłom „Wot gulašoweje kanony k woclowemu gigantej“ wobswětluja blisko Pěskec zaměstnjenu firmu Ziegler, kotraž słuša k najwjetšim dźěłodawarjam w Hornjej Łužicy a kotraž zdawa so konjunkturnej krizy wuspěšnje spřećiwjeć. Dale předstaja Radworčanku Marju Henglowu, kotraž sej płachtakujo po morjach swěta žiwjenski són spjelnja – zhromadnje ze swojim mandźelskim a dźěsćomaj, kotrejž na łódźi sama wuwučuje, a to tež w předmjeće serbšćina.
Portret prócowarja
Telewizijny magacin Łužyca wěnuje so w januarje „sobu najwuznamnišim zachowarju delnjoserbšćiny, kotryž pak je dźensa nimale zabyty“. Tež tohodla staj Ingrid Neumanojc a Wolfgang Albus dokumentariski filmowy portret „Swěte smužki Serbow“ wo Gołkojskim fararju Bjedrichu Frycu nawjerćałoj. Mjez druhim bě za čas wójny mjez Pruskej a Sakskej Stary zakoń přełožił a sporje pjenjezy za ćišć organizował. Tak „přinošowaše njesměrnje zdźerženju a dalewuwiću delnjoserbskeje rěče“.
Telewizija RBB pokaza Łužycu jutře, sobotu, w 13.10 hodź. Wospjetowanje na samsnym sćelaku slěduje srjedu, 22. januara, w 2.45 hodź. Telewizija MDR wusyła magacin sobotu, 25. januara, w 10 hodź. W mediatece ARD je Łužyca wot jutřišeho cyłe lěto kóždy čas přistupna.
Nowy wusyłanski čas
Hłowny přinošk telewizijneho magacina Wuhladko w januarje wěnuje so wjerškam, kotrež so lětsa w Chrósćicach wotměja: „Hač 800. róčnica prěnjeho pisomneho naspomnjenja wsy, Mjezynarodny folklorny festiwal Łužica abo pasion w nazymje – na wobydlerjow čaka na podawki bohate, ale zawěsće tež napinace lěto“. Dale wobswětla „naročny rěčny program DOMOJ, kotryž ma wobdźělnikam zmóžnić, sej serbšćinu w dźewjeć měsacach přiswojić“ kaž tež koncert „Serbske bands & fans“, kotryž je njedawno wjace hač 700 wopytowarjow do Chróšćanskeje wjacezaměroweje hale „Jednota“ přiwabił. Składnostnje „tragiskeje smjerće Jana Skale před 80 lětami“ spominaja nimo toho z portretom na „žurnalista, politikarja, spisowaćela a prěnjeho Serba, kiž je na sćěhi industrializacije za Łužicu spočatk 20. lětstotka skedźbnił“.
Telewizija MDR pokaza Wuhladko jutře, sobotu, tónraz (a wotnětka stajnje) w 12 hodź. Wospjetowanje na samsnym sćelaku slěduje póndźelu, 6. januara, w 6.55 hodź. Telewizija RBB wusyła magacin sobotu, 11. januara, w 13.35 hodź. W mediatece ARD je Wuhladko wot jutřišeho cyłe lěto kóždy čas přistupne.
