LSV Hory – SJ Chrósćicy 3:1 (1:0)
Zestawa hosći: Teschner – Pöpel, Schulze, Pohling, Bětnar, Dehn (88. Teichmann), Runt, Domaška, Šafář, Zahrodnik (60. Hawš), Žur
K swojej poslednjej wonkownej hrě sezony 2014/2015 we wokrjesnej wyšej lize podachu so koparjo Chróšćanskeje SJ na Hory. Tam chcychu na wukony minjenych tydźenjow nawjazać a sej znajmjeńša dypk zaručić. Při horcym wjedrje pak njemějachu nimale přez cyły čas žanu šansu přećiwo sylnym domjacym. Woni wrota Teschnera strašnje nadběhowachu. Po wólnym kopje pak zleća hłójčkowany bul jenož na łatu. Přichodny nadběh hosćićela přez lěwu stronu wuži Rösner a trjechi k 1:0 (20.). Chróšćenjo drje ćišć nětko zesylnichu, ale stoprocentowske móžnosće so jim njeposkićichu. Dehn a Žur z dalokimaj třělwomaj wrota snadnje misnyštaj.