Předsydstwje Zapadołužiskeho koparskeho zwjazka (WFV) a Sakskeho koparskeho zwjazka (SFV) stej tydźenja doskónčnje rozsudźiłoj nětčišu hrajnu dobu zakónčić a žane winowatostne hry hižo njepřewjesć. Wjacore rjadowanja a změny porjadow dyrbja nětko zwoprawdźić. Andreas Lischke, druhi wiceprezident WFV, skedźbnja hišće raz na wšelake aspekty, kotrež su wažne za planowanje koparskeje sezony 2020/2021.
Wšitke hrajne klasy WFV njezměja zestupnikow. Wuwzaća pak tworja cyłki, kotrež su so do 13. měrca 2020 wot winowatostnych hrow wotzjewili, a mustwa, kiž njejsu so do dotal za sezonu 2020/ 2021 w nětčišej hrajnej klasy přizjewili. Tute mustwa, jeli so docyła přizjewja, hraja potom klasu niže.
We wšitkich hrajnych kaž tež starobnych klasach WFV dóstanu mustwa z najlěpšim dypkowym kwocientom prawo na postup do wyšeje klasy. Nochcedźa-li woprawnjene cyłki postupić, ma te prawo přichodne mustwo w tabulce. Koparske cyłki, kotrež su zwólniwe postupić, maja to hač do 15. junija zwjazkej WFV přizjewić. Tak mjenowane kwocientowe tabulki dźensa wozjewimy.