Łužiske liški Běła Woda – Sokoły Heilbronn 4:5 po třělenju penaltyjow (2:2; 2:2; 0:0, 0:1)
Po třoch dobyćach dźěchu Łužiske lodohokejowe liški z wulkim sebjewědomjom do hry přećiwo poslednjemu tabulki. Wědźachu pak, zo ma hósć čerwjenu latarnju jenož koronapandemije dla, a tak bě tójšto hrow Sokołow wupadnyło.
Hornjołužičenjo derje do hry startowachu. Prěnju wulku móžnosć po štyrjoch mjeńšinach hišće njewužichu, hnydom na to pak docpě narodninar Rylan Schwartz nawjedowanje. Jenož dalšu mjeńšinu pozdźišo skićeše so samo wulka móžnosć k 2:0, ale hóstny wrotar měješe něšto přećiwo tomu. Město toho klinkaše we wrotach domjacych, jako njezamó Mac Carruth wotfalšowanu třělwu wotwobarać. Tež štwórta na jeho wrota dźěše do čorneho. Situaciju „2 přećiwo 3“ Sokoljo wulkotnje wuhrachu, tak zo dyrbješe nadběhowar gumijowu tačel jenož hišće do prózdnych wrotow sunyć. Traješe pak jenož někotre sekundy, a hižo Liški wurunachu. Fabian Dietz trjechi po přihrawce Brada Rossa 2:2. Mjez tutymi trojimi wrotami bě so jeničce 131 sekundow minyło.