Mnichow (kh/SN). To bě seklowa čara ze zbožownym wukóncom. Němska narodna koparska wubranka steji we wosmifinalu europskich mišterstwow (EM). Při tym bě turněr za nju nimale ke kóncej. Wjedro wčera wječor w Mnichowje bě jara špatne, a hižo w 11. min. so jemu nalada šeftrenarja Joachima Löwa přiměri. Wina na tym běše madźarska kombinacija ze zwjazkoweje ligi. Po sylnej flance Rolanda Sallaija z Freiburga přesadźi so Ádám Szalai z Mainza mjez Matthiasom Ginterom a Matsom Hummelsom a zhłójčkowa bul do wrotow Manuela Neuera. Němcy drje hru na to dale dominowachu, trěbna inspiracija za přewinjenje madźarskeho škita kaž tež zbožo pak jim pobrachowaštej. Madźarojo sćahnychu so po 1:0 daloko wróćo a sadźachu na podobnu taktiku kaž přećiwo Francoskej. Ćim ćešo za Němcow bě, zadnje mustwo přećiwnika přewinyć.