Festiwal w třikrajowym róžku dale z publikum přićahowacym magnetom

Wodowe Hendrichecy (SN/bn). Filmowy festiwal Nysa, kotryž je towarstwo Kunstbauerkino lětsa 22. raz wuhotowało, bu předwčerawšim zakónčeny. Dohromady něhdźe 6 500 zajimcow – nowy to rekord – je sej cyłkownje wjace hač sto přinoškow w 19 kinach a kulturnišćach w Němskej, Pólskej a Čěskej wobhladało. Nawjedowanska dwójka Ole Staszel a Andreas Friedrich zhladujetaj pozitiwnje na zarjadowanje: „Intensiwne dny leža za nami. Wjeselimy so nad wothłosom publikuma. Třikrajowy róžk sta so wospjet z wosebitej kulisu za jimace wokomiki, napjate rozmołwy, wuměnu měnjenjow w politisce kompleksnym času a za wosobinske zetkanja, kotrež filmowy festiwal wučinjeja. Nadźijamy so, zo móžachmy z tym znamjo towaršnostneho a kulturneho dialoga sadźić.“