ST Marijina hwězda –
ST Kubšicy 4:1 (3:0)
Zestawa domjacych: D. Matik – R. Cyž, T. Jurš, K. Pakoßnick, E. Zynda, Ch. Cyž, F. Bulank, J. Kuring, M. Wróbl (60. J. Ladewig/79. E. Bulank), J. Pakoßnick, F. Peschmann (73. R. Wende)
Po přihrawce Jakoba Pakoßnicka měješe Christof Cyž prěnju wulku móžnosć, z hłowu hižo zahe nawjedowanje docpěć. Po foulu na Maćiju Wróblu dósta domjacy cyłk wólny kop přizwoleny. Florian Bulank jón w formje flanki do šěsnatki přinjese. Ch. Cyž steješe prawje a bul z něhdźe 10 metrow zdalenosće do kašćika kopny (18.). Jeho bratr Ronald měješe jenož šěsćdźesat sekundow pozdźišo šansu mjezywuslědk wutwarić. Swobodnje pak wón bul ze zdalenosće 20 metrow snadnje nimo wrotow zhłójčkowa. Zmylk w natwarje hosći domjacy cyłk wuži. Kapitan Cyž połojcu přećiwniskeho škita sam wuhra a wotpołoži bul na J. Pakoßnicka, kotryž kulu mudrje do praweho róžka zaměstni (32.). Jenož tři minuty pozdźišo móžachu znowa wyskać. Jakobus Paul Kuring namaka po dribblingu Falka Peschmanna, kotryž wrotarja z třělwu mjez nohomaj přelesći. To běše wobhladanja hódny prěni přechod z wida módro-žołtych.
