Nowostka w februarskim wudaću je třidźělna zwisowaca wobalka z ilustraciju Annelie Ćemjerec, kotraž pokazuje metaforiski wobraz kryteho blida. Předstaja mnohostronskosć wuměłču wobdawacych móžnosćow. Byrnjež je před sobu měła, so jej druhdy zdawa, jako njeby ruka dołha dosć była, zo by so jich dótknyła.

Zhromadnje z co-awtorku Wandu Brankačkec napisa Annelie předsłowo. Wonej stej čłonce Kolektiwa Wakuuma, kotryž loni w zjawnym lisće pomjenowanje postawy na naměsće před dwórnišćom w Lubinje kritizowaše. Folkloristisce wuhotowana figura „Błótowčanki“ skutkuje kaž „symbol za strukturelnu njewidźomnosć, kotraž špiheluje, kak so prezenca Delnjoserbow:kow do dźensnišeho skrjesla, depolitizuje a marginalizuje.“ Měnitej, zo jedna so wo reprodukowanje zwobraznjenja z časa, jako rěč germanizaciju wuchodnych kónčin podpěraše. Na postork je město Lubin reagowało: jenož ze změnu titula na „Delnjoserbowka“ a kontekstualizowanjom zornowcoweje skulptury.