Na kulturnej zahrodźe Serbskeho ludoweho ansambla zakónči so lětuša sezona z koncertom skupiny JANKAHANKA. Jutře wječor, sobotu 29. awgusta, w 19.30 hodź. interpretuja hudźbnicy woblubowane serbske ludowe spěwy na swoje wašnje. Hižo dlěje hač dźesać lět su woni swojej hudźbje swěrni. Wopytowarjo dožiwja spěwy w žanrach rock, funk, indie, ale tež měrne balady. Tež tónkróć chcedźa štyrjo hudźbnicy wopytowarjow z překwapjacymi aranžementami zawjeselić. Foto: Jörg Stephan

Septemberski zešiwk kulturneho časopisa prosy nas do rejki. Za słónčnu róžu na titulnym wobrazu, kotruž je Mario Ošika z wolijowymi barbami stworił, je to poslednja reja, jeje zornjatka su dozrawili a widźimy ju k zemi so nachileć. Lěćo pomału dospěwa, tak rysuje to w swojej basni tež Benedikt Dyrlich. Ale hišće rejujemy, a k rejam nam ze swojim akordeonom hudźi Marek Slodička, z kotrymž je so redaktorka Rozhlada na jeho dźěłowym městnje w Serbskim instituće w Choćebuzu na rozmołwu zetkała. Walčik wjerći so nimo pisanskich blidow pjećasydomdźesatlětneho instituta. Za nimi staraja so rěčespytnicy dźensa kaž hižo před lětdźesatkami wo normu spisowneje rěče – dr. Anja Pohončowa a dr. Fabian Kaulfürst rozprawjataj nam wo kodifikaciji serbšćiny. Zetkamy so w časopisu z čłonami Radworskeje katolskeje hólčiny (1933–1936). Tute towarstwo nam Hilžbjeta Delanec jako šulerka w swojim mytowanym fachowym dźěle wotkrywa. Žołmy morja rejuja před kupu Helgoland, a swoje myslički po lekturje wotpowědneje basnje J.B.-Ćišinskeho posrědkuje nam Fabian Kaulfürst.

Skupina Jacke Schwarz Banda wokoło Jakuba Čornaka (nalěwo) přeprošuje jutře, sobotu, w 19 hodź. na koncert do Njebjelčic. Zhromadnje z Torstenom Pötzschom wustupi band w rumnosćach Załožby za wnučkokmanosć na Lipowu 15. Zarjadowanje wotměje so we wobłuku druheho swjedźenja załožby. Zastup je darmotny. Foto: Robert Eckstein

Wodorunje: 3 stolica Čěskeje, 7 hudźbna formacija, 8 typ sowjetskich lětadłow, 9 italske město, 10 rosće na łuce, brjóžku, 12 pomocny dom, 15 hudźbny instrument, 17 Zjednoćene narody, 18 wobšudnik, 20 syć, 21 poschod

Padorunje: 1 rozhłosowa žołma, 2 nócny wotpočink, 3 pohib we wodźe, 4 zapopadnjenje žołmow, 5 na druhe wašnje, 6 konjunkcija, 10 dźěl huslow, 11 stajne woteběranje, 11a forma jězdźidła, 13 šwedska skupina, 14 wuprudźenje, 16 ludowje: strona, 19 łaćonsce/francosce a