Po tym zo su so hižo dźensa dopołdnja 632. Wjacławske wiki w Budyšinje zahajili, přeprošeja prěni adwentny kónc tydźenja hnydom na wjacore adwentne wiki w blišej a dalše wokolinje. Njedźelu w 14 hodź. wotměja so wone w Njebjelčicach na wjesnym parkowanišću. Po programje pěstowarskich dźěći móža holcy a hólcy rumpodichej swoje přeća přeradźić. Wo ćělne derjeměće postaraja so čłonojo domizniskeho towarstwa.
Hižo jutře, sobotu, wot 10 hodź. budu dohodowne wiki w Njeswačidle. W tym času wotewru wosebitu wustajeńcu historiskich hrajkow w domizniskim muzeju. W rumnosćach zwjazka seniorow móža dźěći poprjančki pjec, w 14 hodź. předstaja zakładni šulerjo swój program na žurli hosćenca. W 15 hodź. chce wjesnjanosta wulki wosušk nakrać. Po wulosowanju hodowneje tombole zaklinči dujerska hudźba.
W susodnym Holešowje přewjedu samsny dźeń wot 9 do 17 hodź. tohorunja małe adwentne wiki, a to w Pěčkec zahrodnistwje. Tam smědźa so wopytowarjo na wosebite poskitki wjeselić. Wawrikec catering změje horce wino, kołbaski a něštožkuli dalše přihotowane.
Budyšin (SN). Posledni oktoberski kónc tydźenja wočakuje nas kóžde lěto samsny ritual: W nocy na njedźelu přeńdźemy wot lěćneho časa na zymski. Lětsa je to w nocy na 25. oktobra. Njedźelu změjemy hodźinu wjace, wonu, kotruž smy w měrcu ze zahajenjom lěćneho časa wotedali. Oficialnje so časniki rano w třoch na druhu hodźinu wróćo stajeja.
Wot njedźele je wječor wo hodźinu prjedy ćma a rano hišće tróšku swětlišo. Mnohim ludźom je tele přestajenje časa napinace, wšako dyrbi so ćěło hakle na to zwučić.
Raduš (SN). Wosebita wustajeńca „Silberrausch und Berggeschrey – Archäologie des mittelalterlichen Bergbaus in Sachsen und Böhmen“ na Radušanskim słowjanskim hrodźišću je chětro wuspěšna. To zdźěla towarstwo Słowjanske hrodźišćo Raduš. W meji wotewrjena přehladka pokazuje mnohe originalne, předewšěm drjewjane namakanki, pochadźace ze srjedźowěkowskich podkopkow pola Dippoldiswaldy a Niederpöbela w Rudnych horinach. Nětko, w nazymskich prózdninach, kotrež budu wot póndźele tež w Braniborskej, wočakuja tam 30 000. wopytowarja.
„Jara wuspěšna je wustajeńca awdioguida dla, hdźež namakanki z mnohimi filmami a animacijemi rozłožeja“, wujasnja Anja Bodschwinna, „přehladka so tuž za swójby z dźěćimi derje hodźi.“ Hač do kónca měsaca hišće je prezentacija wšědnje wot 10 do 18 hodź. přistupna.