Wuske hry, snadne wuslědki, mnoho zabawnych duelow a lěčne temperatury postajowachu lětuši swjatkowny koparski turněr wjesnych mustwow w Pěskecach. Nimo hosćićelskeho cyłka nastupichu teamy, wobsadźene wot oldijow hač k młodym talentam, ze Sulšec, Róžanta, Njebjelčic, Noweje Wjeski, Worklec, Serbskich Pazlic a Smjerdźaceje. Z tym bě to wosom zastupnistwow, kotrež so do dweju skupinow rozdźělichu. Po skupinskej fazy stej so stajnje dwě najlěpšej mustwje skupiny za połfinale kwalifikowałoj. Semifinalej buštej potom „přez křiž“ wuhratej. To rěka, zo hraješe najlěpši ze skupiny A přećiwo druhemu najlěpšemu ze skupiny B a nawopak.