Póst Germania Budyšin –

Sokoł Ralbicy/Hórki 1:3 (1:1)

Zestawa hosći: Schöne – B. Heidorn, P. Woko (50. Mjechela), Wałda, Šewc, D. Šołta, Korjenk, Mikławšk, Hicka (82. L. Heidorn), N. Šnajder (88. R. Šnajder), P. Šołta

Sobotu do swjatkow nastupichu Sokoljo w połfinalu wokrjesneho pokalneho koła w měsće přećiwo cyłkej Póst Germanije Budyšin. We wonkownej hrě běchu Ralbičenjo na „Wjelećanskej Anfield Road“, kaž sportnišću na Budyskej Edisonowej tež rěkaja, jasnu poražku 1:6 poćerpili. Tutón raz pak steješe trenarjej Christophej Gloxynej nimale zaso dospołny kader k dispoziciji. Zwonka hrajnišća bě tež wulka syła Sokołskich fanow puć do města namakała, zo bychu swojich hrajerjow wótře podpěrali. Za to bu ekstra bus organizowany. Dohromady 550 přihladowarjow dožiwi potom tež intensiwnu hru.