Po mnohich debatach a diskusijach kołowokoło US-ameriskeho nadběhowarja Folarina Baloguna a jeho čerwjeneje kartki w minjenej hrě smědźeše wón wčera tola nastupić, štož mnozy kritizowachu. Tutón „dar“ pak koparjo USA w hrě wužili njejsu. Po cyłkownje słabym wustupje přećiwo konsekwentnym Belgi­čanam su woni jako posledni z třoch hosćićelow turněr wopušćili. Charles de Ketelaere třěli hižo zahe wrota za Belgisku. Tillman drje móžeše za USA wurunać, tola de Ketelaere wospjet trjechi. W druhim połčasu zwyši Vanaken za Belgisku na 3:1, a w přidatnym hrajnym času trjechi Lukaku hišće štwórte wrota za kónčny wuslědk 4:1. Wčera wječor slědowaše wo­smifinale argentinskeho mustwa přećiwo egyptowskemu. Egyptowski narodny team nawjedowaše přećiwo Južnoameričanam hač do 79. min. z 2:0. Potom pak třěli Argentinjan Romero prěnje wrota. Štyri mjeńšiny pozdźišo docpě Messi wurunanske druhe wrota. Z tym pak njeběše Argentinska hišće hotowa. Enzo Fernández trjechi w přidatnym času dobyćerske wrota.