Lětuši kongres Europasion su před tydźenjomaj w awstriskim měsće St. Martgarethen w Burgenlandźe přewjedli. Mjez wobdźělnikami běše skupina Serbow.

Chrósćicy/St. Margarethen (SN/MiR). Pasionske hry St. Margarethen we awstriskim Burgenlandźe woswjeća lětsa stoty jubilej. Tuž su tamniši akterojo čłonow europskeho třěšneho zwjazka Europasion na kongres přeprosyli. Zdobom su wot 23. meje do 12. julija nowoinscenaciju pasionskeje stawizny „Mirjam – sylna kaž smjerć je lubosć“ předstajili. Předstajenje na hrajnišću w něhdyšej skale su nimo domoródnych a mnohich dalšich zajimcow tež wjacori Serbja, kotřiž su so na kongresu wobdźělili, sćěhowali. „To běše přemóžace dožiwjenje“, rjekny Marcel Haza, kotryž je zhromadnje z Pětrom Zahrodnikom tekstowu předłohu za lońše pasionske hry w Chrósćicach pisał. „Najbóle putało je Mirjam a jeje dušiny a duchowny poměr k Jězusej kaž tež wočiwidna zhromadnosć hrajerjow“, wón doda.