Wothłosowanje wo njewotwisnosći Katalonskeje je so wočiwidnje wuspěšnje za podpěrarjow ideje wotměło. Mócne zražki z policiju, pósłanej wot španiskeho knježerstwa, pokazuja, zo njeda sej to demokratiski stat lubić. Wjetšina ludźi mysli, zo Španiska tak raznje postupuje, dokelž so boji zhubić hospodarsce najwažniši region kraja. Bjezdwěla tomu tak je. Mjenje porno tomu zaběraja so z myslu, zo woznamjenja tajke wotpačenje zdobom zesłabjenje europskeje zhromadnosće, haj roztřěskanje jeje jednotnosće. By-li so hibanje na druhe kraje rozšěriło, móhli mnohe móličke staty bjez hospodarskeje relewancy nastać a tak situacija, kajkaž bě w Europje do Druheje swětoweje wójny. Tajkale słabosć hodźi so lochce znjewužiwać a móže k wójnje wjesć. Tomu znapřećiwić je nadawk Španiskeje. Wona ma Katalonskej dać wjace prawow a wjetšu zamołwitosć při rjadowanju swójskich zajimow a tajkich za cyłu Španisku. Milenka Rječcyna

Šěrokoklamaty nosorohač ma so kumštnje reprodukować. To ma dopomhać zachowanju družiny tohole zwěrjeća, kotrež je wot wotemrěća wohrožene. Po cyłym swěće su jenož hišće tři tajke nosorohače, jedyn mužik a dwě žónce. Přirodne rozmnoženje pak hižo móžne njeje. Hišće lětsa chcedźa Berlinscy eksperća do Kenije jěć a tam prěnje kroki k dalewobstaću tejele družiny zawěsćić.

Žorawje w Braniborskej hotuja so tuchwilu na swój lět do juha. Šěsć měsacow stareho Charlyja pak to njestara. Tón běha radšo za swojim staraćelskim „nanom“ Eberhardom Hennu w Greiffenbergu, wšojedne dokal 73lětny dźe. Tež wopytowarjo, kotřiž na ležownosć něhdyšeho braniborskeho ministra za ratarstwo přichadźeja, ptaka njemyla. Wón so cuzych njeboji a so z nimi sobu wuchodźuje.

Rom (B/SN). W romskim Circus Maximus je bamž Franciskus spominał na wohroženje přez přesćěhanje křesćanow. Tam buchu mjenujcy w času antiki křesćenjo swojeje wěry dla morjeni. Dźensa mamy wjace křesćanskich martrajow, hač w prěnich křesćanskich lětstotkach, rjekny bamž. Jich so njeprašachu, hač su woni ortodoksni, katolscy abo lutherscy, ale jenož, hač su křesćenjo. Na to jich morichu.

Klukanje dźěći

Osnabrück (B/SN). Změna klimy a jeho sćěhi wjedu po „terre des hommes“ k wjetšemu wuklukowanju dźěći we wuwićowych krajach. Tak wjedźechu na při­kład we Burkina Faso wjedrowe ekstremy k tomu, zo je rola wučerpana a zo njemóžeja ludźo ze žnjow hižo žiwi być. Tohodla dyrbi dźeń a wjace dźěći pod ćežkimi wuměnjenjemi dźěłać w podkopkach a tam za złotom pytać. Najčasćišo pak wopušćeja ludźo swoju domiznu. Dźěći so ze šule wutorhnu a dyrbja w cuzbje dźěłać.

Přibliženje křesćanow a židow

Barcelona (SN/JaW). 90 procentow wolerjow je wčera za njewotwisnosć Katalonskeje hłosowało. To wozjewi w nocy rěčnik katalanskeho regionalneho knježerstwa Jordi Turull w Barcelonje. Tamniši knježerstwowy šef Carles Puigdemont wobstawa tuž na njewotwisnosći Katalonskeje a chce wotpowědne kročele přihotować. „Smy sej prawo zdobyli, njewotwisny stat měć“, wón wčera wječor rjekny.

Španiski ministerski prezident Mariano Rajoy ma ludowe wothłosowanje za njelegalne. „Wčera njeje k referendumej dóšło, ale k inscenaciji. Prawniski stat wostanje ze wšej swojej mocu wobstejacy“, Rajoy podšmórny.

Kaž telewizija ARD zdźěla, je z cyłkownje 5,3 milionow wólbokmanych něšto mjenje hač połojca woliła. Z 2,26 milionami wotedatych hłosow zličichu 2,02 milionaj za njewotwisnosć. Něšto mjenje hač 200 000 ludźi bě přećiwo njewotwisnosći. Španiski stat je referendumej zadźěwać spytał. Policija zakroči wčera chětro brutalnje přećiwo wothłosowanju. Rěč je wo wjac hač 800 zranjenych. Winu na eskalaciji situacije sej španiske a katalanske knježerstwo mjez sobu přisuwatej.