Tel Aviv (dpa/SN). Po podlěšenju přiměra w Gazaskej wójnje wo dalšej dnjej nadźijeja so dale na to, přichodnych zastajencow wuswobodźić móc. Wčera wječor běštej so Israel a Hamas na to dojednałoj, na štyri dny wobmjezowany přiměr hač do štwórtka ranja podlěšić. Na to bě Hamas dalšich jědnaće zastajencow pušćiła, mjez nimi dweju Němcow. Israel je runočasnje 33 Palestinjanow ze swojich jastwow pušćił. Minjenu nóc su israelskemu knježerstwu dalšu lisćinu z mjenami zastajencow přepodali, kotrychž chcychu dźensa pušćić. Medije rozprawjeja, zo jedna so wo dźesać wosobow.

Wot minjeneho pjatka je Hamas 69 ­zastajencow pušćiła. Z israelskich jastwow su 150 palestinskich politiskich jatych pušćili. Najmłódši z nich bě 14 lět. W jastwje sedźachu namócnosćow pře­ćiwo Israelej a jeho wobydlerjam dla.

Kijew (dpa/SN). Ćežke zymske njewjedro je sej w Ukrainje po oficialnych informacijach dotal dźesać smjertnych woporow a 23 zranjenych žadało. Mjez zranjenymi stej tež dwě dźěsći, nutřkowne ministerstwo informuje. Najhórje je połoženje w južno-ukrainskej kónčinje wokoło Odessy. Zymski wichor nad Čornym morjom je ruskeje wójny dla tak a tak hižo ćerpjacu kónčinu Ukrainy wosebje raznje trjechił. Wokoło Odessy bě w stach sydlišćach milina wupadnyła. Na dróhach dyrbjachu z tankami sněh suwać a za­sněžene awta z wějeńcow wućahnyć, mjez nimi busy a chorobne awta.

Berlin (dpa/SN). Zwjazkowy kancler Olaf Scholz (SPD) chce najebać deficit wjacorych miliardow eurow w etaće kraja kurs modernizowanja Němskeje wobchować. By „ćežki a njewodajomny zmylk był, při zmištrowanju wulkich wužadanjow modernizowanje kraja zanjechać“, rjekny Scholz dźensa w swojej knježerstwowej deklaraciji w zwjazkowym sejmje. „Modernizowanje je trěbne a prawe, dokelž twori wuměnjenja za dobre dźěłowe městna a sylne hospodarstwo a je tak zakład přichodneho derjeměća.“

Zwjazkowe wustawowe sudnistwo bě přerjadowanje 60 miliardow eurow srědkow za koronakrizu na dobro klimowych projektow w etaće wotpokazało. Nětko wo tym debatuja, kak móhli pobrachowace srědki wurunać.

Scholz dale na tym wobstawa, Němsku dale wuwiwać. „Chcu, zo je Němska cyle prědku“, wón hladajo na hoberske inwesticije w USA a Chinje rjekny.

Nawoda opozicije Friedrich Merz (CDU) narěč Scholza šwikaše: „Wy nje­jednaće kaž politikar, ale kaž zamkar.“

Nawal zymy w mnohich kónčinach Němskeje wulke problemy zawinił

Offenbach/Berlin (dpa/SN). Nawal zymy je nadróžny wobchad we wjacorych zwjazkowych krajach raznje trjechił a tójšto wobchadnych njezbožow zawinował. Při tym zemrěštej znajmjeńša dwě wosobje. We wokrjesu Schwäbisch-Hall w Badensko-Württembergskej je 71lětny wčera wječor při frontalnej zražce na zasněženej hładkej dróze žiwjenje přisadźił. 54lětna šoferka wosoboweho awta ze­mrě w Porynsko-Pfalcy při zražce na zalodźenej dróze. W mnohich dźělach Němskeje wočakowachu dźensa dalši sněh.

W Hessenskej bě połoženje wosebje napjate. Tam dyrbješe wohnjowa wobora něhdźe sto ludźi z awtow wuswobodźić, kotřiž běchu powalenych štomow dla w swojich jězdźidłach zawrjeni. Jich dowjezechu najprjedy raz do hale.

Krajny rada wokrjesa Rheingau-Taunus, Sandro Zehner (CDU) ludźi namołwješe, doma wostać. „Mój naležny apel: Wostańće wutoru na kóždy pad doma. Prošu njewuchodźujće so w lěsu. Tam wobsteji chutny smjertny strach, dokelž móhli so hałzy mokreho sněha dla wotłamać abo štomy so powalić.“