Na premjernym swjedźenju krucha „Greta“, w kotrymž je jako jedyn z třoch elewow činohrajneho studija Budyskeho NSLDź sobu hrał, njeje so Clemens Bobka hižo wobdźělić móhł. Jewišćo wopušći­wši je direktnje do Berlina jěł. Wšako měješe na tamnišej Uniwersiće wuměłstwow nazajtra wot ranja rozsudne 3. koło pruwowanja za dźiwadźelenje. Samo jeho pruwowanski termin su serbskeje premjery dla přesunyli. Dźeń na to bě jasne, zo je wón mjez tymi dźesać wu­zwolenymi, kotrychž tam wot 1. apryla za načasne dźiwadło wukubłuja. „Bě to cyle emocionalny wokomik, jako swoje mjeno na lisćinje wuhladach“, měni 19lětny. Zdobom je to jónkrótnosć w stawi­znach činohrajneho studija, zo dźiwadłowa šula elewu wosrjedź časa wotwabi.

Kóncej Druheje swětoweje wójny wěnuje so wosebita wustajeńca w Měšćanskim muzeju Pirna. Přehladka wěnuje so dožiwjenskim rozprawam ludźi za čas bombardowanja 1945 w měsće. Projektna nawodnica Katrin Purtak pokazuje tule eksponataj, slěbornu łžicu a zeškrěty jědźny grat, kotryž běchu po bombardowanju w korčmje našli. Dokelž je muzej koronawirusa dla zawrjeny, poka­zuja wurězki wustajeńcy a rozprawy swědkow na jeho internetnej stronje. Foto: Daniel Schäfer

Budyšin (SN). Na lětušim wubědźowanju Spěchowanskeho kruha za serbsku ludowu kulturu wo najrjeńše jutrowne jejko je so lětsa 41 dźěći a młodostnych w starobje štyrjoch do 24 lět wobdźěliło. To je jenož jedna wosoba mjenje hač loni. Wobdźělili su so dźěći ­a młodostni z Hornjeje a Delnjeje Łužicy a samo z Hessenskeje. Cyłkownje je towarstwo zapodate kolekcije we wosom starobnych skupinach mytowało. Za to pak dyrbještej jurorce Sonja Hrjehorjowa a Mónika Ošikowa debjene jejka najprjedy ­posudźować. Dobyćerjo lětušeho wubědźowanja wo najrjeńše jutrowne jejko dźěći a młodźiny su: w starobnje skupinje (sk) 4–6 lět Helena Krügerec z Wu­dworja, w sk 7–8 lět Hanka Cyžec z Worklec, w sk 9–10 lět Felix Grimmig z Nowoslic, w sk 11–12 lět Elea Kasperec ze Židźinoho, w sk 13–14 Mathilda ­Fischer z Drježdźan, w sk 15–16 lět Vanessa Trenschel z Allendorfa nad rěku Lumda w Hessenskej, w sk 17–18 lět Ronja Alena Süßec z Wopakeje a w sk 19–24 lět ­Sophie ­Hejduškec z Bóšic. Młodźinske spěchowanske myto spožčichu Emiliji Kasperec ­ze Židźinoho. Najwjac wobdźělnikow bě jejka bosěrowało.

Před 75 lětami mandźelskaj Jurij a Marka Cyžec z jatby wuswobodźenaj

Marce dari mi Ludmila Jelinková, dźowka něhdyšeho generalneho sekretara Serbsko-łužiskeje narodneje rady Jurja Cyža, kotruž wopytachmoj z mandźelskej před lětomaj blisko Prahi. Stej to marce, kotrejž měještaj jeje staršej při sebi, jako Čerwjena armeja 27. apryla 1945 jeju a dalšich z přepytowanskeje jatby Volksgerichts­hofa w Podstupimje wuswobodźi. Za hrózbnu a nječłowjesku nacionalsocialistisku justicu běchu jeći jenož čisła, nan Jurij dósta kulojtu metalowu marku ze zastancowanej ličbu 172 a mać Marja (Marka) 194. W poslednim wokomiku, po spěšnym postupowanju sowjetskeje fronty, buštaj wonaj wumóženaj, po tym zo běchu jeju 20. apryla w jednanju w sydarni před 6. senatom Volksgerichtshofa na Kaisera Wilhelmowej 8 w Podstupimje zasudźili: Jurja Cyža k smjerći a Marku Cyžowu k wosom lětam jastwa. Wotprawjeny Jurij Cyž na zbožo njebu, dokelž běchu zasudźenych nacionalsocialistiskeje justicy na druhich městnach wotprawjeli, a fronta steješe před městom.