Běh 260 sportowcow přiwabił

srjeda, 28. decembera 2016 spisane wot:
Najebać dešć dźeń do běha a šěre mróčele na dnju běha je so 260 wólnočasnych sportowcow 26. decembra na pjeć kilometrow dołhe koło wokoło Němskopazličanskeho hata podało. Natwar Němske Pazlicy dźakuje so wšitkim wobdźělnikam a podpěraćelam a přeje wšěm wšo dobre do lěta 2017. Foto: Norbert Adler

Bejma zaso do Rakec

srjeda, 28. decembera 2016 spisane wot:
Serbski kopar Fabian Bejma z Drježdźan wotnětka zaso w Rakecach za bulom honi. Rodźeny Ralbičan steješe naposledk w kadrje Drježdźany-Laubegast (sakska krajna klasa). Hišće před lětom bě za swoje domjace towarstwo Sokoł Ralbicy/Hórki hrał, do toho hižo raz w Rakecach a pola Budissy Budyšin. Nětko nawróći so k tučasnje druhemu wokrjesneje wyšeje ligi. Jurij Bjeńš

Kurjat do Radworja

srjeda, 28. decembera 2016 spisane wot:
Měrćin Kurjat z Prěčec, rodźeny Sernjančan, póńdźe k ST 1922 Radworjej. Wot dźěćatstwa hraješe wón za Sokoł Ralbicy/Hórki, naposledk stajnje zaso we wotměnje w prěnim a druhim mustwje. Nětko je so rozsudźił, swojeho bywšeho trenarja Pětra Bejmaka do Radworja sćěhować. „Chcu so raz w hinašim towarstwje wuspytać,­ budu pak w Delanach na kóždy pad tež zaso kopańcu hrać“, měni 25lětny.­ Jurij Bjeńš

Pěskečenjo turněr Sokoła dobyli

srjeda, 28. decembera 2016 spisane wot:

Z dobrej tradiciju je, zo so koparske mustwa Sokoła Ralbicy/Hórki mjez hodami a Nowym lětom k swojemu internemu halowemu turněrej zetkawaja. Kotry raz so tón wčera wotmě, wšak njejsu hižo zwěsćić móhli. Na kóždy pad je wón w slěbornej starobje.

Na wčerawše wurisanje móžeše nawoda turněra Jan Hrjehor sydom mustwow witać. Sokoł a Sokoł II, ST Pěskecy (wobstejace z hrajerjow Sokoła, kotřiž w Pěskecach bydla), Sokoł-eksil (něhdyši koparjo Sokoła, kotřiž tuchwilu druhdźe za bulom honja) a tři cyłki starych knjezow. Hrali su stajnje šěsć mjeńšin, a to kóžde mustwo přećiwo kóždemu.

Awtor dźensa Stefan Šmit

Lětsa potajkim sym ja raz posledni. Sportowje widźane tele wuprajenje bjezdwěla nichtó rady njesłyši. Tola wšojedne při čim, jedyn je na kóncu přeco posledni. Štož pak awtomatisce njerěka, zo je wón abo wona najhubjeńši resp. najhubjeńša. Dokelž pak so stajnje na kóncu wotliča, chcu tež ja dźensa jako posledni dopisowar rubriki nachilace so lěto 2016 wotličić, a to ze serbskeho sportoweho wida.

Zhladujemy-li na regionalnu koparsku ligu, móžemy ju ze songom „Kreuzberger Nächte“ wopisować. „Najprjedy započnu so wone chětro pomału, ale potom ...“, tam rěka. Přenjesemy-li tekst spěwa na prěnju połseriju, dyrbimy tež za FC Energiju Choćebuz (FCE) skerje pomały za­počatk a słabu startowu fazu z mało dypkami zwěsćić. Jako přičinu abo zamołwjenje móžemy tu dospołnje nowe mustwo­ mjenować. Přiwšěm pak móhło w tabulce něšto dypkow wjace na konće FCE stać. Hač do dźensnišeho su tři njerozsudne wuslědki w prěnich třoch hrach přećiwo Lokomotiwje Lipsk, RB Lipskej a Viktoriji Berlin ćežka hypoteka. Načolnik Carl Zeiss Jena je sej w tym času hižo plus šěsć dypkow natřělał.

Dwójna nula wolejbulowy turněr dobyła

wutora, 27. decembera 2016 spisane wot:

Po snadnej poražce 21:23 so Serbsko­pazličan Manuel Šołta chětro mjerzaše. Na nócnym wolejbulowym turněrje minjeny štwórtk bě wón mjenujcy ze swojim cyłkom Volker Racho finalnu hru přećiwo mustwu Dwójna nula přěhrał. Šołta, kiž hraje hewak we wobwodnej lize za Viktoriju Worklecy blidotenis, rjekny: „Smy dobre mustwo měli a tež derje hrali.­ Přećiwnik pak měješe Jana Bětnarja. Tón bě prědku při saku kaž sćěna.“ W dwěmaj skupinomaj wubědźowaše so dwanaće mustwow z cyłkownje 75 hrajerkami a hrajerjemi wo pokal Serbskeho młodźinskeho towarstwa Pawk. Połsta přihladowarjow jich pohonjowaše, tak zo bě sportowa hala w Pančicach-Kukowje derje pjelnjena. W 19.20 hodź. bě so turněr započał, w 1.15 hodź. bě kónc. Dwójna nula wubědźi sej prěnje městno, mustwo Volker Racho druhe. Na bronzowym městnje steješe cyłk z Chrósćic, a tak mjenowanu drjewjanu medalju dósta Sorabija Lipsk.

Kónčna tabulka

nócneho wolejbulo weho turněra

1. Dwójna nula

2. Volker Racho

3. Chrósćicy

4. Sorabija Lipsk

5. Bjarnat Krawc Drježdźany

6. Granit Hórki

7. Radwor II

8. Konjecy-Šunow

9. Dźiwje micki

10. Radwor I

11. Satkula

12. Nuknica

FSV Budissa Budyšin – VfB Auerbach 1:1 (0:1)

Zestawa domjacych: Wohlfeld – Barth (71. Hänsch), Klippel, Patka, Heppner, Hoßmang, Barnickel (76. Kloß), Baudis, Müller, Šisler, Němec

Z jenož 11 dypkami z prěnjeje połserije startowachu koparjo Budissy Budyšin přećiwo VfB Auerbachej do druheje połserije 2016/2017. Po 0:1 přećiwo ZFC Meuselwitzej chcychu sej woni nětko tři dypki zawěsćić. Jich trenar Reimund Linkert pak dyrbješe tež tónraz někotrych wažnych hrajerjow narunać. Kapitan Martin Kolan pobrachowaše pjateje žołteje karty dla, Paul Milde, Franz Hausdorf a Maik Salewski běchu zranjeni a Max Hermann chory. Přiwšěm bě mustwo na trawniku sylne dosć. 253 přihladowarjow pak dyrbješe wutrajnych być. Hosćom so lěpje poradźi so prawje do hry namakać. Woni běchu jara spěšni a mytowachu so z nawjedowanjom 0:1 (8.). Budyšenjo namakachu spěšnje wotmołwu. Tola wrotar VfB pokaza při třělwje Josefa Němeca jara dobru paradu (15.). Auerbach hru dale postajowaše. Budyske nadběhi njeběchu strašne.

Wubrance do Pólskeje njepojědźetej

wutora, 27. decembera 2016 spisane wot:
Gogolin. Serbskej dorostowej koparskej wubrance njewobdźělitej so klětu w juliju na mjezynarodnym koparskim turněrje w Pólskej. Zamołwići Serbskeho Sokoła, třěšneho zwjazka sportowych towarstwow, njenańdźechu w zašłych tydźenjach ani jednu dorosćenu wosobu, kotraž by z wubrankomaj dwaj dnjej do Pólskeje­ jěła. Tež na nawěšk w Serbskich Nowinach, na próstwu w Serbskim rozhłosu a na priwatne naprašowanja njebě nichtó reagował. Jurij Bjeńš

Sport (23.12.16)

pjatk, 23. decembera 2016 spisane wot:

Hodownu husycu sej wotběhać

Póndźelu, 26. decembra, poskići to­warstwo Natwar Němske Pazlicy ludowy sport „wotběhanje hodowneje husycy“. Wot 10 hodź. podadźa so wobdźělnicy na pjeć kilometrowske koło wokoło Němskopazličanskeho wulkeho hata.

Za zelenym blidom

Konječanscy blidotenisća přewjedu 27. decembra na wjesnej žurli zaso turněr za wólnočasnych blidotenistow. Wot 17 hodź. změja wjacore blida za dźěći spřihotowane. W 19 hodź. přizamknje so turněr dorosćenych.

Turněr wo pokal TCM

Towarstwo Cyrila a Metoda zarjaduje sobotu, 7. januara, w 14 hodź. w Chróšćanskej „Jednoće“ halowy koparski turněr wo pokal TCM. Přeprošene su wosadne a wjesne cyłki młodźiny kaž tež sportowych jednotkow. Kóždy měł z wosom hrajerjemi nastupić. Přizjewić maja so mustwa hač do pjatka, 30. decembra, pola Guida Zahrodnika pod telefonowym čisłom 0151/52 221759.

Lětsa posledni raz do wody

Płuwarki a płuwarjo sportoweho towarstwa SSV Wojerecy přeprošeja wšitkich zajimcow 29. decembra na posledneje płuwanje lěta. Te budźe wot 14 hodź. w Třižonjanskim jězoru. Štóž do wody dźe, smě so potom „iceman“ abo „icewoman“ mjenować.

Serbska debata

nowostki LND