Po čarje 12 km najsylniše polo atletow
Serbscy atleća na 37. Wopačanskim Běłobóskim běhu běchu Larissa a jeje mać Corinna Měrćinkowa, Richard Paška, Roman Měrćink a Jan Krawc. Cyłkownje je 280 starterow cil docpěło. Jednotliwe distancy běchu 1,5 km; 4,9 km; 12 km a 20 km. Naročnej najdlěšej čarje 12 a 20 km wjedźeštej přez wjeršk 500 metrow wysokeho Běłoboha.
We wurisanju na 4,9 km běštaj cyłkownaj dobyćerjej Jacobine Behrisch z Radeburga (21:30 min.) a Markus Bär ze Załomja (18:57 min.). Serbska gymnaziastka Larissa Měrćinkec wubědźi sej z 30 běharkow wulkotne cyłkowne 2. městno (22:13 min.), štož běše tež slěborne městno w skupinje U 14. Ze štyrjoch žonow, kotrež so na tejle distancy we walkingu wubědźowachu, doběža jeje mać Corinna Měrćinkowa w 35:51 min. jako prěnja do cila.
Najsylniše polo starterow Běłobóskeho běha poda so na distancu 12 km (91 atletow). Cyłkownaj dobyćerjej běštaj Susanne Mielsch z Niskeje (1:04:06 hodź.) a Paul Hentschel ze Žitawy (49:31 min.). Roman Měrćink z Baćonja bě dobyćer w starobnej skupinje 20 (58:34 min.); cyłkownje bě wón třinaty.
Widźał, słyšał, napisał (12.09.16)
Awtor dźensa
Stefan Šmit
Dwě dobyći a dwaj remisaj. W sumje wučinja to wosom dypkow. K tomu maja koparjo Dynama Drježdźany nětko wrotowy poměr 6:3. Za tónle dotal wuběrny wukony steja woni po wčerawšim štwórtym hrajnym dnju na 2. městnje druheje zwjazkoweje koparskeje ligi. Štó z nas bě sej tole na spočatku sezony myslił, wšako njebě zazběhowy program za Dynamo docyła tak lochki. Jako prěni přijědźechu koparjo z Nürnberga. Tydźeń na to wobstachu Dynamowcy suwerenje před wulkotnej kulisu pola Union Berlina. W prěnim kole DFB-pokala porazychu samo prěnjeho ligista RB Lipsk. Nimale samsna bě atmosfera před tydźenjomaj, jako bě kultowe mustwo St. Pauli w Drježdźanach. Runja RB Lipskej dyrbješe so mustwo z Hamburga bjez dypka na domojjězbu nastajić. A nětko 2:0 za Dynamo w Hannoveru!
Wuslědki (12.09.16)
Krajna koparska klasa
Nowe Město – Zschachwitz 3:1 (3:0)
Drježdźanski SC – Trjebin 7:2 (2:0)
Neugersdorf II – Weixdorf 4:2 (2:1)
Biskopicy II – Horni kraj Sprjewja 1:1 (0:1)
Mužakow – Radebeul 2:0 (1:0)
Nowosólc-Hródk – Chrósćicy 3:2 (1:1)
1. Horni kraj Sprjewja 3 7 : 3 7
2. Radebeul 3 4 : 3 6
3. Zschachwitz 3 7 : 7 6
4. Mužakow 2 4 : 2 4
5. Nowosólc-Hródk 2 5 : 4 4
6. Drježdźanski SC 2 8 : 5 3
7. Laubegast 2 5 : 3 3
8. Neugersdorf II 2 5 : 4 3
9. Nowe Město 3 3 : 5 3
10. Trjebin 2 5 : 8 3
11. Weixdorf 3 4 : 7 3
12. Biskopicy II 2 3 : 4 1
13. Chrósćicy 3 4 : 9 0
Sport (09.09.16)
Prěnje WORKWUB
Jutře, sobotu, wotměje so we Worklecach prěnje WORKlečanske WUBědźowanje – WORKWUB. Sportowe towarstwo Viktoria a Worklečanske młode swójby přeprošeja na sportowe popołdnjo. Wot 14 hodź. móža dźěći sportowe znamješko złožić. Skakanski hród a sportowy mobil stej dalšej móžnosći so prawje wucychnować. W 16 hodź. započnje so prěni oficialny WORKWUB – staflowy běh. Najspěšniši čas a najoriginelniši kostim budźetej mytowanej. Zetkanišćo je sportnišćo za šulu.
Budyski měšćanski běh
W sprjewinym měsće přewjedu jutře wot w 10 hodź. 23. Budyske měšćanske běhi. Dopołdnja a připołdnju wubědźuja so dźěći a šulerjo, hłownej běhaj na 5,6 a 9,3 km budźetej w 14 hodź.
Wojerowski cityjowy běh
Samsny dźeń wubědźuja so běharki a běharjo we Wojerecach. Dźesaty króć přewjedu tam cityjowy běh HOYWOJ-DAK. Prěnje běhi započnu so w 11.30 hodź., hłowny na 10 km budźe w 16.45 hodź.
Dumpery so wubědźuja
Štwórty běh wo němske dumperowe mišterstwa wotměja zajutřišim, njedźelu, w delnjołužiskim Drjowku. Tam wubědźuja so dumperowcy wot 14 hodź.
Blidotenisowa doba so započnje
Dobru moralku pokazali
SJ Njebjelčicy
– Liegau-Augustusbad 2:2 (0:2)
Zestawa domjacych: D. Ričel – Hrjehor (83. Šram), Pawlik, Haška, Cyž, Hanuza, F. Ričel (27. Kubaš), Šołta, Čornak, Lejnart, Korjeńk
Tež w domjacej hrě přećiwo cyłkej z Liegauwa-Augustusbada dyrbjachu koparjo Njebjelčanskeje SJ zestawu změnić. Tak pobrachowaše we wšěch mustwowych dźělach w prěnim połčasu wěsta linija. Woni chcychu wot wšeho spočatka ćišć na přećiwnika wukonjeć, štož pak so njeporadźi. W dwubojach běchu často kročel přepozdźe a w natwarje worachu zmylki. Chowancy trenarskeho duwa Panic/Krawčik drje mějachu hru pod kotrolu, ale njemóžachu sej žane jasne šansy wuhrać. W 29. min. porno tomu hosćo prěni raz wyskachu. Wrota běchu rezultat wjacorych zmylkow domjacych. Krótko po tym poradźi so přećiwnikej w 36. min. samsny wotběh, a nadběhowar so z 0:2 podźakowa.
Mnóstwo šansow njewužiwali
ST Marijina hwězda
– SC Großröhrsdorf II 1:1 (1:0)
Zestawa domjacych: O. Schmidt – Wróbl, T. Škoda, Jurš, Smoła, Peschmann, Bělk, Hawš, P. Schmidt, Pakoßnick (57. A. Škoda), Winkler (72. Wagner)
Po skepsanym starće do sezony mějachu koparjo prěnjeho mustwa ST Marijineje hwězdy winowatosć, domjacu hru dobyć. Hižo w 3. min. ležeše bul we wrotach hosći. Po flance Smoły bě jón Peschmann do saka stłóčił. Nětko Pančičenjo hru postajachu. Wuprudźachu wulku wěstotu při přihrawkach a pokazachu sylny běhanski wukon. Pakoßnick (6.), Schmidt (22.) a Hawš (27.) pak njeběchu ze swojimi třělwami na wrota wuspěšni. W 35. min. wuchowachu hosćo kop Jurša na wrotowej liniji. Woni mějachu w prěnim połčasu jenož jednu šansu, Tobias Škoda pak znješkódni ju na liniji (41.).
Domjacy wrotar wyšej poražce zadźěwał
Nadrózna Hrabowka
– ST Radwor 2:5 (1:3)
Zestawa hosći: Wróbl – F. Šěrak, Henka, Šram, Winar, Omran (63. Zähr), Nuk, Karwin, Bejmak, Buša (68. Wjeńka), Schulze (87. C. Šěrak)
Blackbirdrun w Hózku perfektnje organizowany
Druhi raz bě Hózkowska wjesna młodźina běharki a běharjow z blišeje a dalšeje wokoliny na tak mjenowany Blackbird-run přeprosyła. Njewšědne mjeno wotwodźa so wot rěki Čorneho Halštrowa, podłu kotrejež parcours wjedźe. Po lońšej wuspěšnej premjerje witachu organizatorojo lětsa něhdźe 200 sportowcow. Tući dyrbjachu dwě kole po šěsć kilometrach z dohromady 15 zadźěwkami absolwować. Při konstelaciji wšelakorych zadźěwkow dopokazachu hłowni zamołwići wokoło Rolanda Salowskeho zaso wulku kreatiwnosć. Wobdźělnicy dyrbjachu tuž swoju wušiknosć při joggowanju přez wodu a błóto, při přewinjenju wysokich murjow a samo při wohenju respektiwnje elektrice dopokazać.
Wuspěšni konjacy sportowcy
W Holešowskej Dubrawce přewjedźechu minjeny kónc tydźenja lětuši jěchanski a skakanski turněr. Prěni raz su jón zamołwići wokoło Franka Lehdera wot junija na september přepołožili, zo móhli wšitcy pod přijomnišimi wjedrowymi wobstejnosćemi sportować. A to je so nimale poradźiło. Poslednjej pruwowani njedźelu popołdnju pak dyrbjachu njewjedra dla wotprajić.
Zličili su w Holešowskej Dubrawce dohromady 1 000 hosći, kotřiž běchu z wotběhom jara spokojom. Lokalna matadorka Hannah Lehderec, šulerka Serbskeho gymnazija Budyšin, kwalifikowaše so z konjom Chupa Chupom za wulki turněr w Kamjenicy. Corio, jeje tuchwilu najlěpši kóń, njesmědźeše zranjenja dla startować. Jedne třeće městno poradźi so Madlence Šeferec z Kulowskeho jěchanskeho towarstwa, kotraž wobdźěli so tam z kobłu Udine.
Při wšej lochkomyslnosći wysoke dobyće žnjeli
Sokoł Ralbicy/Hórki
– Zeleno-běli Bukecy 6:1 (3:0)
Zestawa domjacych: Ch. Gloxyn – Lulak, Matka, Domaška, von Köding, Wałda (46. S. Bjeńš), Korjeńk, Šewc, D. Gloxyn, Kurjat, B. Bjeńš
Po njetrjebawšej poražce w Ottendorfje-Okrilli a tam poskićenym špatnym wukonje chcychu koparjo Sokoła Ralbicy/Hórki přećiwo Bukecam pokazać, što woprawdźe zamóža. Hru přewjedli su hižo pjatk, kwasa Bukečanskeho trenarja dla. Tež Sokoljo mějachu w swojich rjadach zeleny kwas. Jurij Bjeńš, druhi wrotar prěnjeho mustwa a nazwučowar młodźiny F, je so sobotu woženił. Na tymle městnje wjele zboža!
