We Łužicy tučasnje sněhakować abo sankować njemóžeš, sněh prosće faluje. Tuž dyrbiš znajmjeńša hodźinu jězby z awtom na so wzać, zo by so raz prawje w sněze wucychnować móhł. Jurij Bjeńš je k tomu małe naprašowanje zestajał.
Sabina Hejdušcyna z Nowoslic: Njedawno pobych ze swójbu w Geisingu pola Altenberga. Tam smy cyły dźeń sankowali. Wosebje našej wnučce je so to jara lubiło. Lift drje tam žadyn njeje, spěšnje pak sej stajnje zaso na horu doběžachmy. Běše to woprawdźe lóštny dnjowy wulět.
Stanisław Šewc z Róžanta: Podach so z ćahom do Awstriskeje, hdźež přebywachmy z přećelemi w rjanej hěće. Dyrbju přiznać, zo koronapandemije dla trochu dwělowach, hač sej tam dojědu. Běše pak to prawy rozsud, dokelž dožiwich tam jedyn ze swojich najrjeńšich dowolow. Pisty běchu wulkotnje preparowane, a słónco nam rjenje swěćeše. Koronowych postajenjow dla su zawěsće mnozy doma wostali, a tuž njeběchu pisty kopate połne, kaž to hewak ze zymskich dowolow znaju.
