List Putinej a Zelenskemu: Wuchodna Ukraina njech je neutralne pasmo

Budyšin (SN/mb). „Skónčić ma so morjenje a hida“, sej dwaceći zasłužbnych Serbow hladajo na wójnu w Ukrainje jenož nježada, ale je prezidentomaj Ruskeje a Ukrainy, Putinej a Zelenskemu, konkretny namjet za měr podało. Wotpowědny list su přez wulkopósłanstwje statow w Berlinje hižo sposrědkowali, zo by sčasom k róčnicy zahajenja wójny před lětomaj do Moskwy a Kijewa dóšoł. Iniciatiwu je Marko Suchy zahibał. Něhdyši direktor Załožby za serbski lud, kotryž jako předsyda Serbskeje rady Sakskeje amtěruje, je rěčnik skupiny dwacećoch, kotřiž su namołwu jako prěni podpisali a kiž so nětko dalšich podpěraćelow nadźijeja.