Bataljon za logistiku 471 změje w přichodźe „domiznu“ we Łužicy

Nadrózna Hrabowka (SN/MiP). We łužiskej holi, njedaloko produkciskich halow předewzaća TDDK w Nadróznej Hrabowce, běše wčera popołdnju njewšědnje wjele awtow na lěsnych pućikach po puću. Sylny wobchad „zawinił“ běše zwjazkowy minister za zakitowanje Boris Pistorius (SPD). Hromadźe z ministerskim prezidentom Sakskeje Michaelom Kretschmerom (CDU), je wón tu, na arealu něhdyšeje kaserny NLA, symbolisce natwar noweho stejnišća Zwjazkoweje wobory zahajił. Jeju přewodźachu dalši politikarjo z regiona, mjez nimi wjesnjanosta Njedźichowa Harry Habel (CDU), Wojerowski wyši měšćanosta Torsten Ruban-Zeh (SPD), Budyski krajny rada Udo Wićaz (CDU), serbski zapósłanc CDU w sakskim krajnym sejmje Alojs Mikławšk kaž tež w Baršću rodźena čłonka frakcije SPD w zwjazkowym sejmje Kathrin Michel.