Koparski cyłk Dynama Drježdźany wot wčerawšeje njedźele tabulku krajneje ligi nawjeduja. Mustwo, w kotrymž hraje Radworčanka Johanna Wjeselic, je wčera doma w Drježdźanach 8:1 (3:0) přećiwo mustwu ST Dub Reichenbrand dobyło. We wokrjesnej wyšej lize skónčichu sobotu derby Módro-běli Kulow – Sokoł Ralbicy/Hórki 3:1 (1:1). Hosćo z Delan nawjedowachu z pomocu Richarda Šnajdera 1:0 (19.). Hišće do połčasa pak Paul Kockert wuruna (38.). Běrtlk hodźiny do kónca trjechištaj za hosćićelow w běhu 180 sekundow Marvin Kowalick (76.) a Louis Kreuz (79.). Drohotka Ramnow – SJ Chrósćicy hraještaj 1:2 (1:0). Jan Bogusz bě za SJC wurunał (60.) a Klemens Mark w třećej mjeńšinje přidatneho hrajneho časa 2:1 (90.+3) trjechił. We wokrjesnej lize stafla II su koparjo druheho mustwa SJ Chrósćicy 0:4 (0:1) w Połčnicy přěhrali. Radworske prěnje koparske mustwo je skónčnje dobyło, a to doma 5:2 (3:0) přećiwo koparskej rezerwje Natwara Němske Pazlicy. Třělcy Radworskich wrotow běchu Mick Grubert, Julien Glück­lich, Marius Adam a Caspar Dźisławk, kotryž bě dwójce trjechił. Hru klóšterskich koparjow su přepołožili.