Wodorunje: 3 jednory žnjenski grat, 5 snadź, 6 dobry pokiw, 7 Leistung serbsce, 10 egyptowska stolica, 13 něhdyša krasnosmykarka (Katarina), 14 wu­bědźowanišćo, 15 bratr Abela

Padorunje: 1 ruske město nad Donom, 2 wuchodźowanišćo, 3 lěsne zwěrjo, 4 elektroniska lokalizacija, 8 zwjazk, 9 jednotka kajkosće bencina,­ 11 žónske předmjeno, 12 město w Algeriskej

Chrósćicy (SN). Hišće hač do 28. junija traje předpředań zastupnych lisćikow za lětuši mjezynarodny folklorny festiwal „Łužica 2019“. Po tym zo bě dźensa posledni dźeń předpředanje pola Chróšćanskeho časnikarja Jürgena Njeka, předawaja kartki přichodny tydźeń na Chróšćanskim gmejnskim zarjedźe, a to wot póndźele do pjatka stajnje wot 10 do 12 hodź. a přidatnje wutoru, štwórtk a pjatk wot 15 do 18 hodź. Lisćiki dóstanu zajimcy tohorunja w Budyskej Serbskej kulturnej informaciji a w Ralbičanskej kwětkarni „Kostrjanc“. Kombitiket za sobotu a njedźelu w Chrósćicach płaći w předpředani 15 eurow (potuńšene pjeć eurow), při wječornej kasy 20 eurow (potuńšene šěsć eurow). Swójbnu kartku poskićeja jeno z předpołoženjom swójbneho pasa. Za swjedźenske zahajenje z galaprogramom 4. julija w Budyšinje předawaja kartki w Němsko-Serbskim ludowym dźiwadle za dźesać eurow w předpředani (potuńšene pjeć eurow). Při wječornej kasy płaći lisćik 15 eurow (potuńšene dźewjeć eurow).

Myšecy. Na 70. róčnicu wobstaća zhladuje lětsa Myšečanski dźěćacy dom „Při baćonjacym hnězdźe“. Tamniši hort wobsteji 26 lět. Tohodla přeprošeja wšitke bywše hortowe dźěći jutře, srjedu, wot 15.30 hodź. na 19. lětni swjedźeń. Jón zahaja ze zhromadnym kruhom wulkich a małych hosći na łuce. Na hrajkanišću a w dźěćacym domje samym změja kreatiwne, fantastiske a napjate poskitki spřihotowane. Wo kofej a tykanc je runje tak postarane kaž wo rybičkowe całte a pražene kołbaski. Dźěći, kubłarki a spěchowanske towarstwo wjesela so na bohaty wopyt.

Tež za dwanatkarjow Budyskeho Serbskeho gymnazija wčera rěkaše: „Skónčnje posledni šulski dźeń.“ Kaž přeco ćehnjechu tež lětuši­ wotchadnicy hejsujo a spěwajo po měsće a zbudźichu tak wjeselo mnohich so wuchodźowacych, nakupowacych a wo­sebje turistow. Někotryžkuli z nich so serbskich słowow a žortneho napisa na T-shirće dla dźiwaše. Foto: SN/Hanka Šěnec