Jenož wjeselo a spokojnosć?

pjatk, 03. julija 2015
artikl hódnoćić
(0 )
Jan Kral

Měsacy dołho je so wulka koalicija wo energijowej politice zadźěrała. Srjedu wječor su so nawodźa koaliciskich stron po pjeć hodźinach nócneho wuradźowanja w zasadnych prašenjach dojednali. Nětko so wšitcy wjesela a su spokojom.

Energijowe koncerny dóstanu premije za milinarnje, kotrež do rezerwy sćelu, kanclerka docpěje klimowe zaměry, brunicowa lobby je spokojena a dźěłarnistwa maja za hórnikow dźěło zawěsćene.

Při tak wulkim wjeselu ani njenapadnje, zo so kóšty za rozsud, kotryž pječa nahladnosći Němskeje tyje a klimowe zaměry zawěsći, prawdźepodobnje zaso jónu tomu małemu mužej do móšnički deleguja.

Načasne by skerje było, z widom na mnóstwa naprodukowaneje energije (eko runje tak kaž carbo) a niske płaćizny na milinowej bursy, zo energijowe płaćizny za domjacnosće spadnu. To by wjeselo zbudźiło, hnydom někotre miliony króć. Pěkny Němc kaž Serb pak budźe płaćić a so spěšnje z wyšimi płaćiznami wotnamaka. W druhich krajach by tajki rozsud snano ke generalnemu stawkej wjedł, w Němskej pak ...

wozjewjene w: Rozmyslowane
Prošu přizjewće so, chceće-li komentar podać

nawěšk

nowostki LND