Flensburg (SN). Federalistiska unija europskich narodnych mjeńšin (FUEN) a Młodźina­ europskich narodnych mjeńšin (JEV) zwuraznjatej swoju solidaritu z ćěkancami, kotřiž tuchwilu do Europy přichadźeja. Dźensniša žołma ćěkancow je zhromadny europski towaršnostny nadawk, kotryž sej solidaritu wšitkich krajow žada. Wona staja zhromadnosć krajow před dospołnje nowe wužadanja, a to materielnje kaž tež ideelnje, rěka w zhromadnej nowinskej zdźělence wobeju organizacijow. „Sylne humanitarne zasadźenje je čłowjeska winowatosć“, zdźěli prezidij FUEN jednohłósnje. W tym zwisku pokazuje so na to, zo je pomoc na dobro ćěkancow najwažniši nadawk tam, hdźež je wona trěbna, zo by so čłowjeska dostojnosć zachowała. „Solidarita našich čłonskich organizacijow w potrjechenych krajach je hoberska. Namołwjamy was, z tym pokročować“, rěka w zhromadnej deklaraciji. Zdobom namołwjatej FUEN a JEV wšitke europske staty, ćěkancam pomhać, hdźežkuli je to trjeba.