Mócny nastup AfD wšitke demokratiske strony nastróža
Berlin (dpa/K/SN). Wčerawše wólby krajnych sejmow w třoch zwjazkowych krajach njejsu drje w nich politisku krajinu na hłowu stajili, porjadnje přemjetali wšak ju přiwšěm su, tak jara, zo dotalne koalicije nihdźe hižo móžne njebudu. Woprawdźiteho dobyćerja je při tym jenož jednoho – Alternatiwy za Němsku (AfD), dokelž zamó wona wšudźe wjac hač dźesać procentow nažnjeć a w Saksko-Anhaltskej so samo z druhej najsylnišej mocu stać. Wothladajo wot Zelenych w Badensko-Württembergskej, hdźež woni z ministerskim prezidentom Winfriedom Kretschmannom historiske 30,3 procenty dóstachu, je hewak jeničce přěhračkow, tak pola CDU a SPD, ale tež Lěwicy.
