Za Serbske Nowiny měješe Hanspeter Benad móžnosć, rozmołwjeć so z Gernotom Klieschom, wiceprezidentom a jednaćelom Budissy Budyšin.
Kak wulke bě wolóženje při wothwizdanju koparskeje hry přećiwo BFC Dynamu?
G. Kliesch: Po jědnaće hrach bjez dobyća a přećiwo tajkemu přećiwnikej bě wolóženje hoberske! Kompliment mustwu Budissy za kuražěrowany wustup.
Trenar Tomaš Henčl běše mjez přiwisnikami jara woblubowany. Tež Wy sće sobu rozsudźił, zo dyrbješe wón hić. Nimaće docyła žane brjušebolenje?
G. Kliesch: Njebě lochki rozsud, njehladajo na to smy Tomašej Henčlej za dotalne wuspěchi z Budissu dźakowni.
Budźe so knjez Linkert hač do kónca sezony wo mustwo starać?
G. Kliesch: Reimund Linkert je a wostanje hač do kónca hrajneje doby 2015/2016 trenar Budissy.
Kelko koparjow ma z Budissu zrěčenje za sezonu 2016/2017?
G. Kliesch: Štyrjo maja zrěčenje a pola šesćoch je w zrěčenju opcija.
Jakuba Jakubova zawěsće dźeržeć móc njebudźeće. Maće hižo naslědnika?
G. Kliesch: Smy so z Jakubovom rozmołwjeli. Spočatk apryla wěmy wjace.