Zeleni maja składowanje popjeła z milinarnjow za njezakonske

Drježdźany (dpa/SN). Zeleni so w Sakskej praktikowanemu składowanju popjeła z brunicowych milinarnjow spjećuja. „Sym Lipšćanskemu statnemu rěčnistwu skóržbu přećiwo njeznatym zapodał“, rjekny fachowc za energijowe naležnosće w frakciji Zelenych krajneho sejma Gerd Lippold wčera w Drježdźanach. Wón powołaše so při tym na wuslědk najnowšeho prawniskeho posudka, kotryž běchu Zeleni skazali.

Po informacijach Lippolda wobsahuje popjeł ćežkometale kaž kopor, kadmium, chrom, cynk, wołoj, nikl, žiwe slěbro a talium. Najebać to njeskładuja wotpadki kaž w druhich krajach na deponijach, ale w přirodźe. Tak móhło k zanjerodźenju dnowneje wody dóńć. „Tule riskantnu praksu měli najspěšnišo skónčić.“