Budyšin (SN/MkWj). Po swojim wustupje w telewizijnym wusyłanju „Anne Will“ njedźelu je Budyski wyši měšćanosta Alexander Ahrens (njestronjan) zamołwitych Budyskeje radnicy wčera na krizowe posedźenje zwołał. W dwuhodźinskej diskusiji dojednachu so na wjacore hnydomne naprawy, kaž z nowinskeje zdźělenki radnicy wuchadźa.

Tak chcedźa pruwować, kak móhli štyrjo socialni dźěłaćerjo, kotrychž město tuchwilu financuje, problemowu štwórć na Budyskich Žitnych wikach do swojeho dźěła sobu zapřijeć. Nimo toho maja poskitk Kamjentneho domu na blidźe. Tam namjetuja tež tak mjenowanych streetworkerow zasadźić. Wotpowědny koncept chcedźa nětko zdźěłać.

Problemy na Žitnych wikach budźe tež tema přichodneho posedźenja měšćanskeje rady 28. septembra. Tam ma so mjez druhim wo zakazu alkohola na Budyskej „plaće“ wuradźować. Hišće tónle tydźeń planuja zamołwići sprjewineho města wuradźowanje z policiju wo móžnych zhromadnych kontrolach na Žitnych wikach. Zaměr je widźomna prezenca wobeju zarjadow, zo móhli konflikty sčasom spóznać a reagować.