Politikarjo žadaja sej nowe strategije do přichoda
Budyšin (dpa/SN/BŠe). Přichod přistajenych w němskich wotnožkach kanadiskeho koncerna Bombardier je dale njewěsty. Wčerawše zetkanje němskeho nawodnistwa koncerna ze zwjazkowym hospodarskim ministrom Sigmarom Gabrielom (SPD) kaž tež ze sakskim ministerskim prezidentom Stanisławom Tilichom (CDU) a jeho braniborskim kolegu Dietmarom Woidku (SPD) w Berlinje njeje k wuslědkej wjedło. Přiwšěm su akterojo wo tym wuradźowali, kak hodźał so koncern přerjadować. „Wuchodna Němska trjeba industrijne dźěłowe městna“, Sigmar Gabriel wuzběhny. Politikarjo měli wšitko za to činić, zo dźěłowe městna zawěsća. „To pak je hišće daloki puć“, minister podšmórny.
Předewzaće Bombardier Transportation ma něhdźe 40 000 sobudźěłaćerjow, w Němskej 8 500. Po tuchwilnych planach chce koncern po cyłym swěće něhdźe 5 000 městnow šmórnyć. Najwjetše zawody w Němskej su w Budyšinje, Zhorjelcu a Hennigsdorfje sewjernje Berlina. Spekulacije, jedyn z nich zawrěć chcyć, nawodnistwo wčera wotpokaza.
