Rada za serbske naležnosće komuny znowa za wubědźowanje zdobyła

Budyšin (SN/mwe). W Budyskim Serbskim domje zahaji Marja Michałkowa (CDU), předsydka Rady za serbske naležnosće Sakskeje, minjeny pjatk nawječor třeće wubědźowanje „Rěčam přichilena komuna – Serbska rěč je žiwa“. Dr. Mat­thias Rößler (CDU), nětčiši prezident a čłon­ Sakskeho krajneho sejma, je znowa za kóžde pjate lěto wotměwace so wubědźowanje patronat přewzał. W jeho mjenje móžeše Marja Michałkowa Andreju Dombois (CDU), wiceprezidentku krajneho sejma, na zahajenske zarjadowanje witać. Přitomni běchu tohorunja Budyski krajny rada Michael Harig a jeho Zhorjelski kolega Bernd Lange, zapósłancy sakskeho krajneho sejma Marko Šiman, Lothar Bienst (wšitcy CDU), Hajko Kozel (Lěwica), wjesnjanosća serbskich komunow a jich zastupjerjo, direktor Załožby za serbski lud Jan Budar, předsyda Domowiny Dawid Statnik, regionalni rěčnicy kaž tež dalši zastupjerjo zjawneho žiwjenja.