Po sakskim Serbskim zakonju ma statne knježerstwo znajmjeńša jónu w legislaturnej periodźe rozprawu wo połoženju serbskeho ludu Sakskemu krajnemu sejmej podać.

Budyšin/Drježdźany (SN/at). W statnym ministerstwje za wědomosć a kulturu (SMWK) w Drježdźanach přihotuja nowu rozprawu wo połoženju serbskeho ludu. „K tomu je SMWK wo přidźěła prosyło tamne sakske ministerstwa, Radu za serbske naležnosće, Domowinu – Zwjazk Łužiskich Serbow, Załožbu za serbski lud, Katolski běrow Sakskeje kaž tež Ewangelski běrow Sakskeje“, zdźěli jeho nowinski rěčnik Andreas Friedrich na naprašowanje našeho wječornika.

Zo by Domowina poziciju jako třěšny zwjazk formulować móhła, je wona próstwu ministerstwa swojimaj sobustawomaj Serbskemu šulskemu towarstwu (SŠT) a Towarstwu Cyrila a Metoda (TCM) dale dała. Runje tak je so na Serbske ewangelske towarstwo wobroćiła. Stejišćo Domowiny mjeztym w přisłušnym ministerstwje předleži, kaž nowinska rěčnica Borbora Felberowa dźensa potwjerdźi.