Budyšin (CS/SN). Na wobydlerski dialog Zelenych běchu zajimcy minjeny štwórtk do Budyskeho Kamjentneho domu prošeni. Na prašenja něhdźe 15 hosći wotmołwjał je zapósłanc zwjazkoweho sejma Stephan Kühn (Zwjazk 90/Zeleni) z Drježdźan. Hłowny zaměr zarjadowanja bě, perspektiwy za Łužicu za čas po brunicy rysować a w tej naležnosći so z wobydlerjemi rozmołwjeć. Tak chcedźa Zeleni zmylkam zadźěwać, kotrež běchu swój čas w Poruhrskej činili, jako wudobywanje kamjentneho wuhla skónčichu. Před tym tež Budyski wyši měšćanosta Alexander Ahrens (njestronjan) warnowaše. Wón twjerdźeše, zo njemějachu zamołwići w Poruhrskej wotpowědne koncepty. Ahrens bě sej wěsty, zo njebudźe Budyšin direktnje wot zakónčenja zmilinjenja brunicy potrjecheny. Přiwšěm je w Budyšinje tójšto technologiskich firmow, kotrež su na wšelake wašnje z brunicu splećene. Stephan Kühn namołwi, zo njesměło k tak raznym hospodarskim změnam přińć kaž 1990. Nichtó njemóže tuchwilu rjec, hdy přestanu brunicu wudobywać. W lěće wólbow zwjazkoweho sejma so w tymle prašenju nichtó njezwaži jasne stejišćo zabrać.