Struktura serbskich katolskich wosadow Drježdźansko-Mišnjanskeho biskopstwa so hač do lěta 2025 njezměni. To je biskop Timmerevers rozsudźił.
Budyšin (SN/JaW). Serbske wosady Drježdźansko-Mišnjanskeho biskopstwa, kotrež mjenuja wotnětka oficialnje Serbski pastoralny rum (SPR), dyrbja hač do lěta 2025 zhromadny pastoralny koncept wuwić a wothłosować. To je biskop Heinrich Timmerevers jim do nadawka dał. Jako nawodu SPR wobkrući wón Budyskeho tachantskeho fararja Wita Sćapana. Hač do lěta 2025 wostanje tuž struktura serbskich wosadow, kajkaž tuchwilu je.
Wo rozsudźe biskopa informowaše zastupnikow serbskich wosadow a dalšich cyrkwinskich městnow generalny wikar Andreas Kutschke srjedu w Budyšinje. „Z widom na specifisku situaciju zmóžnja biskop wosadam Chrósćicy, Njebjelčicy, Wotrow, Radwor, Ralbicy a Baćoń kaž tež farskej wikariji Pančicy-Kukow wurjadne rjadowanje“, zdźěla biskopstwo.
