W sydom krajach postajene mnóstwo docpěte
Flensburg (SN/JaW). Wobydlerska iniciatiwa Federalistiskeje unije europskich narodnych mjeńšin (FUEN) Minority SafePack (MSPI) je prěni zadźěwk přewinyła. Kaž Berlinski mjeńšinowy sekretariat FUEN zdźěli, je w sydom krajach EU postajene mnóstwo podpismow docpěte – w Madźarskej, Rumunskej, Letiskej, Słowakskej, Španiskej, Danskej a Chorwatskej. Tak je FUEN jedne z wuměnjenjow za wuspěch MSPI zmištrowała. „Po postajenjach EU wo wobydlerskich iniciatiwach dyrbja tajke akcije dohromady znajmjeńša jedyn milion podpismow w čłonskich krajach unije nazběrać a maja zdobom w sydom statach na zakładźe wobydlerskich ličbow kraja postajeny minimum signumow docpěć“, rěka z generalneho sekretariata FUEN w Flensburgu. We wjacorych krajach su samo wjele wjac podpismow zezběrali. W Madźarskej na přikład wjac hač 400 000 – trěbnych bě 15 750, w Rumunskej nimale 280 000 – trěbnych bě 24 000 a w Słowakskej 55 000 podpismow – trěbnych bě 9 750.