W měsće nad Sprjewju nastanje nowe wukubłanišćo sakskeje policije

Budyšin (UM/SN). Klětu nalěto maja bagry na Budyskej Kantowej dźěłać započeć. Na to staj so Budyski zapósłanc w Sakskim krajnym sejmje Marko Šiman a sakski minister za nutřkowne naležnosće Roland Wöller (wobaj CDU) při jeho prěnim wopyće we wukubłanišću sakskeje policije, kotrež je na Budyskej Kantowej zaměstnjene, minjeny pjatk dojednałoj. Spočatnje bě so Wöller prašenju, hdy ma so dołho planowany twar skónčnje za­hajić, hišće wuwinył. Šiman pak tłóčeše: Dalše dlijenje njesmě być. Wón poćahowaše so na připrajenje bywšeho ministerskeho prezidenta Stanisława Tilicha (CDU), po kotrymž chcychu wukubłanski centrum hižo lětsa rozšěrjeć započeć. Hłowna přičina dlijenja leži po słowach Wöllera w sakskim financnym minister­stwje – w tamnišim statnym zawodźe za imobilije a twarske naležnosće, hdźež nimaja pječa dosć planowarjow. Přiwšěm je sej sakske knježerstwo přezjedne, zo ma so policija zesylnić. Přichodne lěta chcedźa tysac přidatnych městnow wutworić.