Berlin (dpa/SN). Němscy politikarjo so hladajo na planowane nowe eurokritiske knježerstwo w Italskej starosća. Koalicija populistiskeho hibanja Pjeć hwězdow a prawicarskopopulistiskeje Lega „dawa přičinu so starosćić“, rjekny Michael Roth, statny minister we wonkownym ministerstwje, nowinarjam. „Europa trjeba bóle dyžli prjedy spušćomneho partnera, kiž widźi swoje městno wosrjedź Europy a nic w dwělomnej wěstoće nacionalizma“, Roth potwjerdźi.

Italski statny prezident Sergio Mattarella bě srjedu jurista a politiskeho nowačka Giuseppu Conteho (njestronjan) powołał, kiž měješe nowe knježerstwo zestajeć. Conte je zhromadny kandidat Pjeć hwězdow a Lega. Wobě stronje stej mjeztym koaliciske zrěčenje zdźěłałoj, w kotrymž su zniženje dawkow a zakładne dochody za kóždeho zakótwjene.

Zwjazkowy předsyda AfD Alexander Gauland je sej wěsty, zo „njebudźe Italska z nowym knježerstwom k stabiliće Europy a EU přinošować. Najlěpje by nětko było, by-li z europasma wustupiła.“ To by tež w zmysle Němskeje było, dokelž „by němskemu dawkipłaćerjej tójšto pjenjez zalutowało“.