Kamjenc (SN/at). Dźěłowy kruh Serbja pola krajneho předsydstwa SPD Sakskeje chce swoju dźěławosć přichodne měsacy na komunalne wólby klětu w juniju a krajneho sejma spočatk septembra wusměrić. Na to dojednachu so čłonojo na zetkanju minjenu srjedu w Kamjencu.
„Měli so dorozumić wo swójskim přinošku za wokrjesny wólbny program“, namjetowaše wokrjesny radźićel Sven Scheidemantel. K tomu mjenowaše ćežišći, serbsku wysoku šulu a rozšěrjenje serbskeje rěče w zjawnosći. Konrad Skatula, pokładnik Budyskeho wokrjesneho zwjazka SPD, wudospołni, zo njeměli serbopolitiske rozmyslowanja na wólby wokrjesneho sejmika wobmjezować, ale tež na wólby krajneho sejma poćahować.
Po słowach Christiny Ruby měł z wokrjesneho wólbneho programa SPD „signal němskim susodam“ nastupajo dwurěčnosć a bikulturnosć wuchadźeć. Wobě měli dale spěchować, je nawoda dźěłoweho kruha Benedikt Dyrlich přeswědčeny. Runje tak słušeja wuprajenja wo rěčnej politice k tomu.